Azərbaycan, Bakı, 20 avqust / Trend , müxbir E.Babayev/ Solçu Azərbaycan Sosial Demokrat Partiyasının (ASDP) Mərkəzi Komitəsinin keçmiş üzvü Elşən Manafov prezident seçkilərində namizədliyini irəli sürmək niyyətindədir.
"Ancaq seçkidə iştirak etmək üçün maliyyə dəstəyi yoxdur. Maliyyə resrursları olsa mən seçkidə namizədliyimi verə bilərəm", çərşənbə günü Trend -a Manafov bildirib.
Trend -un arayışı: ASDP-nin bazar ertəsi keçirilən Mərkəzi Plenumunun iclasında prezident seçkilərində öz namizədi ilə iştirak etməmək barədə qərar çıxarılıb. Qərar partiyada maliyyə probleminin olması ilə izah olunub.
ASDP Mərkəzi Komitəsinin üzvü Manafov isə bu qərara etiraz olaraq tutduğu vəzifədən istefa verib. O, istefasının səbəbini partiyanın prezident seçkisində iştirak etməmək barədə qəbul etdiyi qərarı və partiyada avtoritarizmin yaranması ilə izah edib.
Azərbaycanda prezident seçkisi oktyabrın 15-də keçiriləcək.
Manafov bildirib ki, o, ASDP üzvlüyündən isə istefa verməyib.
"Sentyabr ayında ASDP-nin qurultayı olacaq və mən qurultayda partiyanın həmsədri Araz Əlizadənin istefasını tələb edəcəyəm", - deyən Manafov vurğulayıb ki, bütün dünyada solçu partiyalar ciddi uğurlar əldə edirlər. Azərbaycanda isə sol partiya olan ASDP heç bir nəaliyyət əldə etməyib. Partiyanın rayon təşkilatlarının fəaliyyəti iflic vəziyyətinə düşüb. Manafov onu da bildirib ki, partiyanın rəhbərliyində yalnız Əlizadənin adamları təmsil olunur və partiyanın digər həmsədri Ayaz Mütəllibovun bir nəfər də olsun tərəfdarı yoxdur.
"Mən qurultayda partiyanın rəhbərliyinə islahatçı gənclərin gəlməsini tələb edəcəyəm", - deyən Manafov əlavə edib ki, o, istəyinə nail olmasa, ASDP-ni tam tərk edib, Solçu Demokrat Partiyası yaradacaq.
ASDP həmsədri Araz Əlizadə isə Trend -a bildirib ki, Manafovun indiyə qədər susması və indi birdən-birə bu tipli bəyanatlar verməsi maraq doğurur. "Görünür, onun hansısa məqsədi var və o, əsl niyyətini açıqlasa daha yaxşı olar. Qaldı ki, rəhbərlikdə Mütəllibovun adamlarının olmamasına, bu bəyanat da doğru deyil. Biz Mütəllibovla birləşəndə partiyanın rəhbər strukturlarında demək olar ki, eyni sayda təmsil olunurduq. Sonradan kimlərsə partiyanı tərk edib. Sabah Manafov da partiyanı tərk etsə, biz onun ayağına yıxılıb, saxlayası deyilik", - deyən Əlizadə Manafov tərəfindən onun istefasının tələb edilməsinə də toxunub.
Əlizadə vurğulayıb ki, bu məsələ qurultayın səlahiyyətində olan məsələdir. "Onu da bildirim ki, Manafov hər dəfə Mərkəzi Komitəyə seçkilər zamanı kifayət qədər səs qazana bilmirdi. Yalnız mənim təkidimdən sonra o, Mərkəzi Komitəyə düşə bilib", - deyən ASDP həmsədri Manafovun Mütəllibov tərəfindən idarə olunduğuna isə inanmadığın deyib. "Mütəllibov seçkidə iştirakın əleyhinədir. Manafov isə seçkidə iştirak etməyin tərəfdarı kimi çıxış edir", - deyə o əlavə edib
ASDP sol təmayüllü müxalifət partiyasıdır. Partiyanın həmsədri Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevrilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Məqalə müəllifi ilə əlaqə ünvanı: [email protected]
