Azərbaycan, Bakı, 25 avqust / Trend , müxbir E.Babayev/ Azərbaycanın eks-spikeri prezident seçkiləri ilə bağlı mövqeyini açıqlayıb.
"Mən artıq seçki ilə bağlı mövqeyimi müəyyənləşdirmişəm. Prezident seçkilərində indiki dövlət başçısı İlham Əliyevin namizədliyini müdafiə edəcəyəm və seçkilərdə məhz ona səs verəcəyəm", bazar ertəsi Trend -a eks spiker Yaqub Məmmədov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər seçkilərə 18 iddiaçı qoşulub. Bunlar Yeni Azərbaycan Partiyasının namizədi İlham Əliyev, Böyük Quruluş Partiyasının (BQP) sədri, millət vəkili Fazil Qəzənfəroğlu, Fikrət Əhədov (Təhsil Nazirliyi elmi-metodik jurnalının şöbə redaktoru), Ümid Partiyasının sədri İqbal Ağazadə, Yaşar Əhmədov (işsiz), Əlimuxtar Əkbərov (təqaüdçü), Sevinc Quliyeva (Sumqayıt Mərkəzi Klinik Xəstəxanasında sanitar), Vüqar Seyidov (həkim) Müasir Müsavat Partiyasının sədri Hafiz Hacıyev, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Liberal-Demokrat Partiyasının sədri Fuad Əliyev, Yaşıllar Partiyasının sədri Mais Güləliyev, Qüdrət İsaqov (AMEA-nın Fizika İnstitutunun aparıcı elmi işçisi), "Mədəniyyət" qəzetinin məsləhətçisi Teymur Quliyev və "Ekspertiza" qəzetinin baş redaktoru Süleyman Quliyev, Xalq Cəbhəsi Partiyasının Ali Məclisinin keçmiş sədri Qulamhüseyn Əlibəyli, namizədlikləri özləri tərəfindən irəli sürülən Arif Əliyev və Əli Ağaevlidir.
Məmmədov bildirib ki, mövcud namizədlər sırasında İlham Əliyevdən başqa ölkəyə rəhbərlik edə biləcək şəxs mövcud deyil. "İlham Əliyev artıq 5 ildir prezidentdir, təcrübəsi var. Digər prezidentliyə namizədlərin bir qismini ümumiyyətlə, tanımıram. Mən ad çəkmək istəmirəm, ancaq indiyə qədər 5 adama rəhbərlik edə bilməyənlər, ölkəyə rəhbərlik edə bilməzlər. Bu namizədlərin içərisində ən layiqlisi İlham Əliyevdir və mən ona səs verəcəyəm", - deyən Məmmədov bəyan edib ki, İlham Əliyevin mütləq səs çoxluğu ilə qələbə qazanacağına şübhə etmir.
Bir sıra müxalifət partiyalarının seçkidə iştirak etməməsinə də toxunan Məmmədov bildirib ki, siyasi partiyaların seçkiləri boykot etməsi çətin məsələdir. "Seçkiləri yalnız seçicilər boykot edə bilər", - deyən Məmmədov əlavə edib ki, müxalifətin bu addımının nə qədər effektli olmasını gələcək göstərəcək.
Məmmədov 1992-ci ilin martında parlamentin spikeri olub. Ayaz Mütəllibov prezident kürsüsündən kənarlaşdırıldıqdan sonra bir müddət onu əvəz edib. Elə həmin il AXC hakimiyyətə gəldikdən sonra vəzifəsindən istefa verib. Məmmədov 2005-ci il parlament seçkilərində müxalif "Yeni Siyasət" blokunun həmtəsisçisi olub və millət vəkilliyinə namizədliyini irəli sürüb.
Məqalə müəllifi ilə əlaqə ünvanı: [email protected]
