Azərbaycan, Bakı, 04 sentyabr/ Trend , müxbir Ü.Sadıqova/ Dəməşqdə Suriya, Türkiyə, Fransa və Qətərin hökumət başçılarının iclası öz işinə başlayıb. Görüş mühüm regional məsələlər, o cümlədən vasitəsiz Suriya-İsrail danışıqları müzakirə olunacaq.
"Aljazeera" telekanalının cümə axşamı verdiyi xəbərə görə, Fransa prezidenti Nikolya Sarkozi Suriyaya iki günlük səfəri zamanı bildirib ki, bu görüş Yaxın Şərqdə vəziyyətin sabitləşməsində müsbət rol oynayacaq, eləcə də Suriya və Fransa münasibətlərində yeni səhifə açacaq.
Suriya prezidenti Bəşər Əsəd mətbuat konfransında bəyan edib ki, regional problemlərin nizamlanmasında Avropanın iştirakına razıdır. O qeyd edib ki, Fransa bu rolu çox yaxşı yerinə yetirir.
İclas zamanı Fransa və Suriya prezidentləri Türkiyənin Baş naziri Rəcəb Tayyib Ərdoğan və Qətər əmiri Həməd bin Xəlifə Al-Sani ilə Fars körfəzi ölkələrinin Avropa İttifaqı ilə enerji əməkdaşlığı, həmçinin, Suriya və Türkiyənin Aİ və digər körfəz ölkələri ilə birgə layihələrini müzakirə edəcəklər.
Məqalə müllifi ilə əlaqə ünvanı - [email protected]