Azərbaycan, Bakı, 05 sentyabr / Trend , müxbir İ.Əlizadə/ Azərbaycan parlamentinin payız sessiyası oktyabrın 2-də fəaliyyətə başlayacaq. "Pamazan bayramı oktyabrın 1-nə təsadüf etdiyinə görə payız sessiyası bir gün gec başlayacaq", bu barədə cümə günü Trend -a parlamentin mətbuat xidmətindən bildirilib.
Trend -un arayışı: Daxili Nizamnaməyə görə, parlamentin payız sessiyası hər ilin oktyabrın 1-də başlayır və dekabrın 30-da başa çatır. Yaz sessiyası isə fevralın 1-də başlayır və mayın 31-də yekunlaşır.
Mətbuat xidmətindən onu da bildiriblər ki, daxili Nizamnaməyə görə, hər ilin sentyabrın 15-də parlamentin daimi komissiyaları öz işinə başlayır: "Ancaq bu il parlamentin daimi komissiyaları bu müddəti gözləmədən öz işlərinə başlamaq qərarı veriblər",
Parlamentin payız sessiyası spiker Oqtay Əsədovun 2008-ci ilin yaz və növbədənkənar sessiyalarının yekunları barədə hesabatının dinlənilməsi ilə başlayacaq. Sonra millət vəkilləri payız sessiyasının qanunvericilik işləri üzrə planını müzakirə edərək təsdiqləyəcəklər.
Parlamentin ilk iclaslarında "2009-cu il dövlət büdcəsi haqqında", "Arıçılıq haqqında" (birinci oxunuş), ""Ərazi quruluşu və inzibati ərazi bölgüsü haqqında" qanuna dəyişikliklər edilməsi barədə", "Uşaq və yeniyetmə idmanı haqqında" (birinci oxunuş), eləcə də "Təhsil haqqında" (ikinci oxunuş) qanun layihələrinin müzakirəsi gözlənilir.
Məqalə müəllifi ilə əlaqə ünvanı: [email protected]
