...

ABŞ və Rusiyanın İranla bağlı mövqeləri yaxınlaşır - İran Tədqiqatçılar assosiasiyası Mərkəzinin sədri

Siyasət Materials 27 Sentyabr 2008 16:30

Trend-i buradan izləyin

Azərbaycan, Bakı, 27 sentyabr / Trend , T.Cəfərov /ABŞ və Qərbin İrana qarşı yeni qətnamə layihəsi qəbul etməyə hazırlaşması ABŞ və Rusiyanın İranla bağlı məsələdə razılığa gəlmələrini göstərir.

"BMT Təhlükəsizlik Şurasının (TŞ) 5 daimi üzvu + Almaniya tərəfindən İrana qarşı yeni qətnamə layihəsinin hazırlanması Amerika və Rusiya arasında bəzi məsələlərdə razılığın əldə olunmasını göstərir", - deyə Fransada fəaliyyət göstərən İran Tədqiqat Mərkəzinin sədri Hüseyn Lacevərdi Trend -a bildirib.

BBC-nin sentyabrın 27-də yaydığı məlumatına əsasən, cümə günü "Altılıq" ölkələrinin planlaşdırılmamış iclası keçirilib və iclasda İrana qarşı yeni qətnamə layihəsi hazırlanıb. Bu sənəd gələn həftənin şənbə günü təsdiq olunmaq üçün müzakirə olunacaq. Yeni layihəyə əsasən, İrana qarşı əlavə sanksiyalar tətbiq olunmayacaq, lakin sənəd BMT tərəfindən indiyədək qəbul olunmuş İrana qarşı sanksiyaların icra olunmasına təkid edir.

Lacevərdi bildirib ki, Gürcüstanda münaqişə yarandıqdan sonra G8 qrupu (iri sənaye ölkələrindən ibarət qrup) iki dəfə iclas keçirmək istəməsinə baxmayaraq, Amerika bu iclasda iştirak etməkdən boyun qaçırıb və Rusiyanı bu qrupdan çıxartmaqla hədələyib. Rusiya isə ABŞ və Qərbin təzyiqlərindən çəkinir.

"Rusiya Sovet dövründə olduğu kimi artıq güclü deyil, bu səbəbdən Qərb və ABŞ qarşısında geri çəkilməyə və gələn həftənin şənbə günü təsdiq olunmalı qətnamə ilə razılaşmağa məcburdur", - deyə Lacevərdi şənbə günü telefonla Trend - a bildirib.

London Yevrosevik Tədqiqat Mərkəzinin sədri, digər iranlı ekspert Piruz Müctəhidzadə isə hesab edir ki, bu qətnamə heç bir əhəmiyyət daşımır.

Onun fikrincə, Amerika prezidenti Corc Buş İrana qarşı qətnamənin qəbul edilməsinə çalışsa da, bəzi dövlətlər tərəfindən buna qarşı etirazlarla rastlaşırdı. Bu səbəbdən də böyük dövlətlər - Rusiya və Çindən bu məsələdə onunla həmrəylik nümayiş etdirmələri xahiş edib: "İrana qarşı yeni qətnamə layihəsi ABŞ prezidentinin xahişi ilə hazırlanıb və heç bir əhəmiyyət daşımır", - deyə Müctəhidzadə bildirib.

Bir neçə gün öncə "5+1" qrupunun Nyu-Yorkda keçirilən iclasında İrana qarşı yeni qətnamənin təsdiqi ilə bağlı məsələ ləğv olunmuşdu. Rusiya İrana qarşı yeni qətnamənin qəbul edilməsinin əleyhinə çıxış etmişdi. Belə güman olunurdu ki, yaxın zamanlarda İrana qarşı yeni qətnamənin təsdiqi gözlənilmir, lakin sentyabrın 25-də Rusiya və ABŞ XİN rəhbərlərinin görüşündən sonra vəziyyət dəyişdi.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti