...

Azərbaycanda polislərin cəzalandırılması mütəmadi olaraq həyata keçirilir - daxili işlər nazirinin müavini

Siyasət Materials 30 Oktyabr 2008 13:49

Trend-i buradan izləyin

Azərbaycan, Bakı, 30 oktyabr / Trend , müxbir S.Kazımlı / Azərbaycan Respublikası daxili işlər nazirinin müavini, polis general-leytenantı Əsgər Ələkbərovun cümə axşamı Trend -a musahibəsi

- Əsgər müəllim, son zamanlar cinayət törətməkdə təqsirləndirilərək tutulan şəxslər arasında keçmiş polis əməkdaşları ilə yanaşı hazırda çalışan polislər də var. Bu fakt nazirliyi narahat edirmi?

- Polis cəmiyyətin bir hissəsidir. Biz həmişə bunu demişik və heç vaxt inkar etməmişik. Amma cəmiyyətin içərisində olan insanlar istər polis orqanlarında işləsin, istərsə də digər hüquq-mühafizə orqanlarında, bunun fərqi yoxdur. Hər bir şəxs son anda Azərbaycan qanunları qarşısında cavab verir. Qeyd etdiyiniz şəxslər isə vaxtı ilə polis orqanlarında işləyiblər və çox güman ki, onlar qanuna zidd əməllərinə görə, polis orqanlarından uzaqlaşdırılıblar. Bu hadisəni fədakar polis ordusunun sıralarına yazmaq düzgün deyil.

- Azərbaycanda cinayət törətdiklərinə görə barələrində axtarış elan olunan şəxslər bəzən xarici ölkələrdə mühacir statusu alırlar. Bu fakt cinayətkarların tutulub, istintaq orqanlarına təhvil verilməsində əlavə problemlər yaradırmı?

- Axtarışda olanların tutulub istintaqa təhvil verilməsi üçün uğurlu tədbirlər həyata keçirilir. Bütün dünyada mövcud beynəlxalq hüquq normalarına uyğun əlaqələr qurulur. Hansı ölkələrlə hüquqi yardım haqqında müqavilələrimiz, sazişlərimiz varsa, həmin ölkələrlə bu məsələ asan həll olunur. Bizə məlum olan, istintaqdan yayınan, yaxud da ölkəmizdə hansısa qanuna zidd əməl törədib, xarici ölkələrdə gizlənən şəxsləri tutub ölkəmizə gətirə bilirik. Bu işlərlə bağlı həmin ölkələrə bizim əməkdaşlarımız ezam olunur, həmin ölkənin hüquq-mühafizə orqanlarının əməkdaşları ilə birlikdə cinayət törətməkdə təqsirləndirilərək barəsində axtarış elan olunan şəxslərin tutulması üçün birgə əməliyyat-axtarış tədbirləri həyata keçirirlər. Hansı ölkələrlə ki, hüquqi yadım haqda müqavilələrimiz yoxdur, istər-istəməz orada müəyyən çətinliklər yaranır. Hələlik belə bir ciddi problemlə rastlaşmamışıq. Cinayət törədən şəxslərin bir çoxu gedib müxtəlif xarici ölkələrin vətəndaşlığını qəbul edirlər. Yaxud da onların ölkəmizə gətirilməsi üçün bizdən hüquqi əsaslar tələb olunur. Son illər bir sıra ölkələrlə bu sahədə əməkdaşlığımız yaradılıb və davam etdirilir. Gələcəkdə hüquqi yardıma dair sazişimiz olmayan həmin ölkələrin hamısı ilə əməkdaşlıq yaradılacaq. Bu istiqamətdə müəyyən yazışmalar, ilkin tədbirlər həyata keçirilir.

- Ən cox hansı ölkələrdə Azərbaycan hüquq-mühafizə orqanları tərəfindən axtarışda olan şəxslər var?

- Bizdə ən çox 1994-cü ilin oktyabr, 1995-ci mart hadisələrində dövlət çevirilişinə cəhd ilə bağlı Rusiya, Ukrayna və Türkiyədə axtarışda olan vətəndaşlar var idi. Demək olar ki, həmin axtarışda olan şəxslərin əksəriyyəti tutularaq istintaqa təhvil verilib.

- Axratışda olan şəxslərin tutulması prosesi qərb ölkələrində necə həyata keçirilir?

- Qərb ölkələrində axtarışda olan və orada gizlənən şəxslərin sayı bir o qədər də çox deyil. Ümumiyyətlə, ötən illər də daxil olmaqla davamlı olaraq daxili işlər orqanları tərəfindən axtarışda olan cinayətkarların 70 faizindən çoxu tutulub. Xüsusi ilə də cəmiyyət, ölkə və insanlar üçün müəyyən təhlükə yaradan, səs-küylü cinayətlərdə iştirak edən və barəsində axtarış elan olunan şəxslər hamısı tutularaq istintaq orqanlarına təhvil veriliblər.

- Bir müddət öncə nazirliyin əməkdaşları tərəfindən rayon polis idarə və şöbələrində yoxlamalar aparılırdı. Həmin yoxlamaların polisdə yeni islahatların aparılması ilə əlaqədar olması haqda bildirilirdi. Bu belədirmi?

- Həmin yoxlamalar islahatlar aparmaq məqsədilə həyata keçirilmirdi. Daxili işlər orqanlarında 1995-96-ci illərdən başlayaraq xüsusi islahatlar aparılıb. Həmin islahatların da nəticələridir ki, bu gün ölkəmizdə sabitlik mövcudur və cinayətkarlığa qarşı uğurlu mübarizə aparılır. Baş vermiş cinayətlərin davamlı olaraq istər aylar, istərsə də illər üzrə açılması 90 faizdən artıq təmin edilir.

- Cinayətkarlığa qarşı daha effektli mübarizə aparmaq üçün polis orqanlarında nə kimi çatışmazlıqlar var və hansı yeniliklərin tətbiq edilməsi vacibdir?

- Bilirsiniz ki, indi texnika əsridir. Rabitə, kommunikasıya və informasiyalarla bağlı polisdə yüksək səviyyədə islahatlar aparılır. Yeni avadanlıqlar alınıb. Son illər Daxili İşlər Nazirliyində " 102" xidməti fəaliyyətə başlayıb. Vətəndaşlar artıq istədiyi an və çox qısa müddətdə müraciətlərini nazirliyin rəhbərliyinə çatdıra bilirlər. Həmin müraciətlər rəhbərliyin nəzarətində olur. Bundan əlavə içtimai asayış üçün gərgin hesab olunan meydanlar, yollar, küçələr hamısı nazirliyin videogörüntüləri ilə daim nəzarət altındadır. İctimaiyyətlə təmas yüksək səviyyədədir.

- Bəs polisin özündə baş verən mənfi hallara nəzarət necə həyata keçirilir?

- Fərqi yoxdur, istər polis olsun, istərsə də adı vətəndaş, qanun qarşısında hamı bərabərdir. Polis əməkdaşları da qanuna zidd hərəkətlərinə görə cəzalandırılmalıdırlar. İşlərində nöqsanlara yol vermiş polis əməkdaşlarının cazalandırılması mütəmadi olaraq hər il aparılır. Bu sahədə ötən illərlə müqayisədə azalmalar var. Çünki aparılan islahatlar öz bəhrəsini verib. Eyni zamanda, polisin işində aşkarlıq, şəffaflıq artır. Polisin hər bir qanuna zidd hərəkəti haqda nazirliyin rəhbərliyinə daxil olan müraciətlər araşdırılır. İstər yazılı, istərsə də saytlar vasitəsilə müraciətlər olunur və həmin müraciətlər hamısı Daxili İşlər Nazirliyi rəhbərliyinin nəzarət ilə ciddi araşdırılır, qanunla nəzərdə tutulan qaydada tədbirlər görülür.

- Bir müddət öncə Daxili Qoşunların "N" saylı hərbi hissəsində "dedovşina" faktı ilə bağlı video-çarxlar yayılmışdı. Bu faktın öyrənilməsi və belə halların yenidən baş verməməsi üçün nazirliyin rəhbərliyi hansı araşdırmalar aparır?

- Həmin hadisə təsadüfi hal idi. Həmin hadisə ilə əlaqədar nazirliyin rəhbərliyi tərəfindən çox ciddi tədbirlər görülüb. Nəzarət artırılıb və hesab edirəm ki, belə hallar bundan sonra təkrarlanmayacaq.

Məqalə müəllifi ilə əlaqə ünvanı:[email protected]

Xəbər lenti

Xəbər lenti