Azərbaycan, Bakı, 03 noyabr/ Trend , müxbir A.Hüseynbala / Azərbaycan Demokrat Partiyasının müxalifətin yeni yaradılacaq ittifaqı üçün irəli sürdüyü prinsiplərin heç biri nəzərə alınmayıb.
"Yeni birlikdə təmsil olunacaq siyasi hərəkatların heç birinin keçmişdəki addımlarını müzakirəyə çıxarmamağı təklif edirdim. Gələcəkdə müttəfiq olacağımız bəzi tərəflər isə birliyin bələdiyyə və parlament seçkiləri ərəfəsində yaradılmasını istədilər", - bazar ertəsi Trend -a Azərbaycan Demokrat Partiyasının (ADP) sədri Sərdar Cəlaldoğlu bildirib.
Trend - un arayışı: Müxalifətin Əməkdaşliq Mərkəzinə "Azadliq" bloku (Azərbaycan Xalq Cəbhəsi, Liberal, Vətəndaş və İnkişaf partiyalari), Müsavat Partiaysi və "Azərbaycan Naminə" İctimai Forum (ANİF) daxildir. Sentyabrin əvvəlində bu siyasi təşkilatlar oktyabrin 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib. ADP isə seçkidə iştirakdan imtina edib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasinin yaranması baş tutmur.
ADP sədri müxalifətin daha geniş tərkibdə birləşməsi üçün artıq heç bir cəhd göstərməyəcəyini deyib.
"Prezident seçkiləri başa çatmamış əsas müxalifət hərəkatları bir yerə yığışa bilsəydi, əməkdaşlıq daha ciddi və effektli olardı", - Cəlaloğlu vurğulayıb.
ADP sədri müxalifətin bələdiyyə və parlament seçkiləri ərəfəsi hər hansı birlik yarada biləcəyinə inanmır.
"Bu cür düşünənlər yanılırlar, çünki həmin dövrdə müxalifət arasında münasibətlər daha da pisləşəcək", - Cəlaloğlu deyib.
Onun sözlərinə görə, müxalif hərəkatların daha geniş birliyinin alınmamasına digər səbəb prezident seçkisinin nəticələrinə fərqli münasibətlər olub.
"ADP prezident seçkisinin nəticələri ilə bağlı tamamilə fərqli mövqeyini açıqladı. Məqsədimiz iqtidar-müxalifət münasibətlərindəki qarşıdurmanı aradan qaldırmaq və sivil inkişafa nail olmaqdır", - ADP sədri əlavə edib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Bundan sonra ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]
