Azərbaycan, Bakı, 07 noyabr/ Trend , müxbir A.Hüseynbala/ Azərbaycanın müxalif Liberal Demokrat Partiyası (ALDP) 2009 - cu il bələdiyyə və 2010 - cu il parlament seçkilərində müxalifətin birgə iştirakını mümkün hesab edir.
Partiyanın mətbuat xidmətindən verilən məlumata görə, Sədr Aparatının iclasında ALDP sədri Fuad Əliyev deyib ki, son vaxtlar yaranan seçki blokları müxalifətin parçalanmasına səbəb olmaqla yanaşı, qələbə ümidlərini də azaldır.
Trend - un arayışı : ALDP 1999-cu ildə yaradılıb. 2000 - ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh İbadov və Fuad Əliyev ALDP adına iddia ediblər. 2004 - cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
ALDP - nin sədri Fuad Əliyev Sədr Aparatının iclasında deyib ki, müxalifət birləşərsə, bələdiyyə və parlament seçkilərində qalib gəlmək mümkün olacaq: "Özlərini "aparıcı" müxalifət adlandıranlar, amma, əslində, "cib" müxalifət olan partiyalar yenidən gündəmə gəlmək üçün birgə ittifaq yaradaraq, müxalifətin adından danışmaq niyyətindədirlər", - Əliyev vurğulayıb.
Onun fikrincə, iqtidarla dialoqa müxalifətin sağlam qüvvələri qetməlidir: "Destruktiv müxalifətin ittifaqı cəmiyyətin birliyinə yox, parçalanmasına, seçkilərin şəffaflığını kölgə altına almaqa xidmət edir. Azərbaycanda keçiriləcək bələdiyyə və parlament seçkilərinin şəffaflığını təmin etməyi və sağlam qüvvələrin birliyini zəruri hesab edirəm, - ALDP sədri bildirib.
Əliyev Vətəndaş Həmrəyliyi, Ədalət, Vahid Azərbaycan Milli Birlik, Azadlıq, Sosial Demokrat, Bütöv Azərbaycan Xalq Cəbhəsi, Böyük Quruluş, Yurddaş, Milli İstiqlal, Böyük Azərbaycan, Klassik Xalq Cəbhəsi, Vətəndaş Birliyi, Ümid və yeni yaranacaq Aydınlar partiyalarının bələdiyyə və parlament seçkilərində birgə iştirakını mümkün hesab edir.
Məqalə müəllifi ilə əlaqə ünvanı: [email protected]
