İran, Tehran, 08 noyabr / Trend , müxbir A.Namdari / İran parlamentinin nümayəndəsi Cavad Aryənməneş bildirib ki, Barak Obama Amerikanın ümumi siyasətini dəyişə bilməyəcək və onun prezidentliyi dövründəTehran - Vaşinqton əlaqələrinin yaxşılaşağına ümid yoxdur.
"İran prezidenti Mahmud Əhmədinejadın Obamaya təbrik məktubu da iki ölkə arasında əlaqələrin yaxşılaşmasına kömək edə bilməyəcək", - deyə Parlamentin mədəniyyət məsələləri üzrə komissiyanın üzvi Aryənməneş şənbə günü Trend - a bildirib.
İran prezidenti Mahmud Əhmədinejad çərşənbə günü ABŞ -ın yeni seçilmiş prezidenti Obamaya təbrik məktubu göndərib.Qeyd edək Ki, İran İslam İnqilabından sonra , bu, İran rəsmisinin ABŞ prezidentinə ilk təbrik məktubudur. Əhmədinejad təbrik məktubunda həmkarının Amerikanın xarici siyasətində dəyişikliklər etməsi ilə bağlı arzusunu ifadə edib..
Barak Obama cümə günü özünün ilk mətbuat konfransında Əhmədinejadın məktubunu aldığını və cavab verəcəyini bildirib.
Aryənməneşin fikrincə, Amerikada güclü təsirə malik olan ayrı - ayrı lobbilər yeni prezidentin beynəlxalq məsələlərdə əsaslı dəyişikliklər etməsinə mane olacaqlar.
"Amerika istismarçı və imperialist siyasətindən əl çəkməyənədək, Tehran -Vaşinqton arasında əlaqələrin yaxşılaşmasına ümid bəsləmək olmaz",- deyə Aryənməneş bildirib.
Barak Obama 2008 - ci il noyabrın 4 - də rəqibi Con Makkeynə qalib gələrək, ABŞ - ın 44 - cü prezidenti seçilmişdir. O, ABŞ-ın ilk qaradərili prezidentidir. Obama 2009 - cu il yanvarın 20 - də prezident səlahiyyətlərinin icrasına başlayacaq.
İran - ABŞ münasibətləri 1979 - cu il İran İslam İnqilabından sonra gərginləşib. 30 ilə yaxındır ki, İran və ABŞ arasında birbaşa diplomatik əlaqə yoxdur. İsveçrənin İrandakı səfirliyi Amerikanın İranda mənafeyini qoruyur.
