Trend -un Fars redaksiyasının Əfqanıstan XİN rəhbəri Rəngin Dadfər Spanta ilə eksklüziv müsahibəsi
- Əfqanıstan prezidenti Talibanla müzakirəyə çağırıb və Taliban rəhbəri Molla Ömər silahı yerə qoyarsa, onun təhlükəsizliyinə təminat verəcəyini bəyan edib. Belə bəyanatlar əfqan xalqının, yerli və xarici hərbçilərin terrorçularla mübarizəsinə mənfi təsir göstərməzmi?
- Müzakirə, terrorizmlə mübarizə stra tegiyasıdır, çünki hər mübarizənin sonu sülhdür. Bu baxımdan, biz silahı yerə qoyub, Əfqanıstanın Ana Qanununa hörmətlə yanaşmaq istəyənlərlə müzakirəyə hər zaman hazırıq. Kərzainin bəyanatı buna xidmət edir və bizim xarici müttəfiqlərimiz də bu qərarı dəstəkləyiblər.
Biz çalışırıq ki, prezident seçkiləri ərəfəsində ölkədə nisbi sülh və sabitlik yarada bilək, bu isə, terrorçularla, bir növ, dil tapmağı tələb edir.
Bunu da əlavə edim ki, dediklərim Əfqanıstan hakimiyyətinin terrorçularla mübarizədə gücsüzlüyünü göstərmir. Milli ordu və polis, müxaliflərlə mübarizəyə qadirdir.
-- Siz Əfqanıstanda müxalif qüvvələrlə hakimiyyət arasında vasitəçiliyə hazılıq bildirən Türkiyə və Səudiyyə Ərəbistanı ölkələrinin təkliflərini necə dəyərləndirirsiz?
- Əfqanıstan prezidenti Səudiyyə Ərəbistanının kralından xahiş edib ki, regionda terrorizmlə mübarizədə fəal iştirak etsin. Bu təklifdən sonra, Əl-Riyadda iftar mərasimində Səudiyyə Ərəbistanının kralı Taliban hakimiyyətinin sabiq üzvlərindən, həm də Əfqanıstan hakmiyyətini dəstəkləyən nümayəndələr dəvət edərək, tərəflər arasında müzakirə aparıb. Lakin bu görüşdə Əfqanıstan hakmiyyətinin rəsmi nümayəndəsi olmayıb.
Biz Əfqanıstanın təhlükəsizliyini qoruyan hər hansı bir addımı alqışlayırıq. Biz ölkəmizin təhlükəsizliyinin bərpası və demokratıyanın inkişafı ilə bağlı öhdəlik götürmüşük, beləliklə, bizi məqsədimizə çatdıracaq hər hansı bir addımı dəstəkləyirik.
-- Pakistanın Daxili Kəşfiyyat Orqanının (İSİ) siyasi qolunun fəaliyyətinin dayandırılmasının Əfqanıstanın təhlükəsizliyinə təsirini necə qiymətləndirirsiz? Rəsmi Kabil bu qurumu Əfqanıstana müdaxilə etməkdə yenə də günahlandırırmı?
-- Hazırkı hakimiyyətin (hakim Xalq partiyası) rəsmilərilə çox yaxşı əlaqələrimiz var və bu fürsətdən istifadə etmək lazımıdır. İSİ-nin siyasi qolunun fəaliyyətinin dayandırılmasına gəldikdə, belə düşünürəm ki, dünyanın heç bir yerində siyasi qolu olmayan kəşfiyyat orqanı yoxdur.
- Əfqanıstan hökümətinin narkotik maddələr və terrorizmlə mübarizədə mövqeyi ilə bağlı nə deyə bilərsiniz?
- Terror, narkotik maddələr və silah üçbucağı Əfqanıstan hakimiyyətinin ən əsas problemidir. Bu problemləri aradan qaldırmaq üçün uzunmüddətli bir plan lazımdır. Bu planda həm Əfqanıstan hökuməti, həm də beynəlxalq ictimaiyyət fəal iştirak etməlidir.Biz narkotiklərlə mübarizədə çox ciddiyik və bu istiqamətdə xüsusi planlarla yanaşı, bu sahə üzrə mübarizə təşkilatları yaratmışıq.
Biz ölkədə xaşxaş istehsalının 19 faiz azaldılmasına nail olmuşuq və bu sahədə fəaliyyətimizi davam etdiririk. Terror, narkotika və silah. Biz bu üç aimillə eyni zamanda mübarizə aparmalıyıq.
