Azərbaycan, Naxçıvan 03 dekabr / Trend , müxbir E.Məmmədov/ Naxçıvanda sərhəd zastavaları üçün yeni əsgəri-məişət yaşayış kompleksi istifadəyə verilib.
Trend -un bölgə müxbirinin məlumatına görə, kompleks Muxtar Respublikanın Culfa rayonunun Gülüstan və Ordubad rayonunun Aza kəndlərində yerləşən sərhəd zastavalarının şəxsi heyəti üçün inşa edilib.
Naxçıvan Sərhəd Dviziyasının komandiri, polkovnik-leytenant Asəf Quliyev bildirib ki, Gülüstan Sərhəd zastavasında hər cür şəraitlə təmin olunmuş 50 yerlik yataqxana və zabit ailələri üçün 8 mənzilli yaşayış kompleksi istifadəyə verilib. İki mərtəbədən ibarət olan binadakı mənzillər 2 otaqlıdır.
Zastavada silah-sursat, əşya-geyim, mənzil-istismar, ərzaq anbarları, hamam-çamaşırxana kompleksi, xidməti heyvanlar üçün bina, əsgər yeməkxanası da inşa olunub. Bundan əlavə, ərazidə yeraltı tərəvəz anbarı da tikilib.
Açılış mərasimində iştirak edən Naxçıvan Muxtar Respublikası Ali Məclisinin sədri Vasif Talıbov ilin sonunadək daha 4 sərhəd zastavasında da əsgəri-məişət yaşayış kompleksi və zabit ailələri üçün mənzillərin istifadəyə veriləcəyini bildirib.
Azərbaycanın üç rəngli bayrağı ilk dəfə olaraq Naxçıvan Sərhəd Dəstəsi tərəfindən qaldırılıb.
Məqalə müəllifi ilə əlaqə ünvanı: [email protected]
