Azərbaycan, Bakı, 03 dekabr/ Trend , müxbir A.Hüseynbala/ Azərbaycanın müxalif partiyaları heç bir şərt irəli sürmədən birləşməlidir.
"Azərbaycan məmurlarının millətin taleyinə biganə münasibətinin getdikcə artdığı vaxtda, müxalifətin güc kimi ortaya çıxmasının tərəfdarıyam", - çərşənbə günü Trend -a müxalif Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı bildirib.
Trend - un arayışı: Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur.
Onun sözlərinə görə, indiki şəraitdə müxalifətin hansı formada birləşməsini söyləmək çətindir.
"Təəssüf ki, uzun illərdir ki, bəzi müxalifət partiyaları iqtidara qarşı yox, bir-birilərinə qarşı mübarizə aparırlar", - Rüstəmxanlı deyib.
VHP sədrinin fikrincə, müxalif qüvvələr qeyd-şərtsiz bir yerə toplaşmalıdırlar.
"Birlik istəyənlər isə yenidən müəyyən şərtlər irəli sürür. Onlar taleyin istəyindən çıxış etmək əvəzinə, şüarçılıqla məşğuldurlar. Hər partiya lideri birliklə bağlı öz formatını irəli sürür", - Rüstəmxanlı vurğulayıb.
VHP Milli Azadlıq Hərəkatının liderlərindən olan Rüstəmxanlının rəhbərliyi altında 1992-ci il 26 sentyabrda bir qrup ziyalı tərəfindən yaradılıb. 3 noyabr 1992-ci ildə dövlət qeydiyyatına alınan VHP 1995, 2000, 2005-ci ilin parlament, 2003-cü ilin prezident, 1999, 2004-cü ilin bələdiyyə seçkilərində iştirak edib. Partiyanın sədri millət vəkili, xalq şairi Rüstəmxanlı 1991-95-ci illərdə mətbuat və informasiya naziri, 2003-cü il prezident seçkilərində isə prezidentliyə namizəd olub.
Məqalə müəllifi ilə əlaqə ünvanı: [email protected]
