Azərbaycan, Bakı, 11 dekabr/ Trend , müxbir Ü.İsmayılova/ Noyabrda Bakıda tikinti materiallarının qiyməti oktyabrla müqayisədə 26,3 faiz azalıb, - "Əmlak Bazarı İştirakçıları" İctimai Birliyindən cümə axşamı bildiriblər.
"Qiymətlərin azalması idxal olunan tikinti materiallarının ucuzlaşmasına görə baş verib", - təşkilatdan bildiriblər.
Bu bazarda orta qiymətlərin azalması ilə əlaqədar, yerli istehsal tikinti materiallarının qiymətləri də düşüb.
İctimai birliyin noyabrda keçirdiyi monitorinqin əhatə etdiyi yerli istehsal tikinti materiallarının bazardakı payı 51,2 faiz təşkil edib.
İctimai birlik ötən ay 82 növ və 36 adda tikinti materialı üzrə monitorinq aparıb. Ay ərzində 27 növ üzrə azalma müşahidə olunub, 40 növ üzrə qiymətlər sabit qalıb, 15 növ üzrə bahalaşma baş verib.
Noyabrda qiymətlərin ən yüksək azalması armaturda - 36,3 faiz, dəmir təbəqələr - 26,3 faiz, sink təbəqələr - 19,8 faiz, alçipan - 16, 7 faiz, PVC yapışdırıcı - 12,5 faiz, karxana daşı - 10,5 faiz, laminat - 9,8 faiz, şifer - 6,9 faiz - müşahidə olunub.
Noyabrda şüşə 50 faiz, plastik borular - 16 faiz, tikinti qumu - 13,8 faiz bahalaşıb.
Müəlliflə əlaqə saxlamaq üçün elektron ünvan: [email protected]
