Əfqanıstan, Kabil, 29 dekabr / Trend , müxbir A.Hakimi/ Əfqanıstanın Rabitə Nazirliyi bildirib ki, ölkədə internet xidmətlərinin inkişaf etməməsinin əsas səbəbi sabitsizlik və daimi elektrik enerjisinin olmamasıdır.
"Əfqanıstandakı qeyri - sabitlik və elektrik enerjisinin fasilələrlə verilməsi ölkədə internet ximətlərinin qiymətlərinin baha olmasının əsas səbəbidir",-deyə Əfqanıstan Rabitə Nazirliyinin sözçüsü Əbdülhadi Hadi bazar ertəsi Trend -a bildirib.
Əfqanıstanda Taliban qrupunun süqutundan sonra, beynəlxalq ictimaiyyət tətəfindən bu ölkənin elektrik təchizatının inkişaf etdirilməsinə milyonlarla dollar maliyə yardımı göstərilsə də, əhalinin əksər hissəsi elektrik enerjisinin olmamasından narahatdır. Rəsmi statistikaya əsasən, Əfqanıstan əhalisinin 10 faizi elektrik enerjisi ilə təmin olunub. Elektrik enerjisi onlara fasilələrlə verilir.
Hadinin sözlərinə görə, problemlərə baxmayaraq, ölkədə rabitə və informasiya texnologiyaları sahəsi sürətlə inkişaf edir.
"Əfqanıstanda rabitə və internet xidmətləri peyk vasitəsilə həyata keçrildiyindən, xidmətlərin qiyməti bahadır",-deyə Hadi bildirib.
Hadinin sözlərinə görə, Rabitə Nazirliyi çalışır ki, internet və rabitə xidmətlərinin yaxşılaşdırılması məqsədilə yaxın iki ayda fibrooptik kabel sistemi layihəsini həyata keçirsin. "Əfqanıstanda fibrooptik kabel sistemi layihəsi icra olunduqdan sonra , ölkə həm qonşu ölkələr və həm beynəlxalq fibrooptik kabel magistralına qoşulacaq və internet qiymətləri yarıyadək azalacaq",-deyə Hadi bildirib.
Əfqanıstanın Rabitə Nazirliyinin yaydığı məlumata əsasən, hazırda ölkədə yarım milyondan artıq internet istifadəçisi var.
Hadi bildirib ki, Əfqanıstanda internet xidmətləri provayderliyini 14 xüsusi şirkət həyata keçirir.
Onun sözlərinə görə, fibrooptik kabel sistemi layihəsinin icrası ölkədə internet xidmətlərinin yaxşılaşmasına və rüşvətxorluğun azalmasına səbəb olacaq.
Statistik məlumata əsasən, Əfqanıstan əhalisinin 30 faizi mobil rabitə xidmətindən istifadə edir. Hazırda ölkədə mobil rabitə sahəsində Əfqanıstanın dövlət şirkəti "Telekom 4" - dən başqa, 4 xüsusi şirkət də fəaliyyət göstərir. Şirkətlər arası rəqabət mobil telefon danışıqlarının qiymətlərinin düşməsinə səbəb olub. Mobil rabitə şirkətləri mobil internet xidməti də göstərirlər.
Müəlliflə əlaqə saxlamaq üçün elektron ünvan [email protected]
