Azərbaycan, Bakı, 08 yanvar / Trend , müxbir C.Babayeva/ Azərbaycanın müxalifət Müsavat Partiyası referendumla bağlı yaratdığı "Respublikaçılar" təşəbbüs qrupuna digər siyasi təşkilatları qəbul etməyə hazır olsa da, müxalifətin vahid təşəbbüs qrupunun yaradılmasına ümid etmir.
"Vahid təşəbbüs qrupunun yaradılması ilə bağlı ümumi fikir olarsa, müxalifət partiyaları ilə bu mövzunu muzakirə etməyə hazırıq. Lakin vahid təşəbbüs qrupunun yaradılması qeyri-mümkündür və tələsik qərarların qəbul olunması zərurəti Seçki Məcəlləsində müddətlərin çox qısa olması ilə əlaqədardır", - cümə axşamı Trend -a Müsavat Partiyasının Mərkəzi İcra Aparatının rəhbəri Arif Hacılı bildirib.
Trend -un arayışı: Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Hacılının sözlərinə görə, Müsavat Partiyası digər təşəbbüs qruplarının yaranmasına müsbət yanaşacaq. "Müxtəlif təşəbbüs qruplarının qeydiyyata alınmasının üstünlükləri var. Qruplar qeydə alınandan sonra onlara pulsuz efir vaxtı, kütləvi aksiyaların keçirilməsinə, təşviqat materiallarını yaymağa şərait yaradılır. Əsas üstünlük isə, hər bir təşviqat qrupunun bütün seçki məntəqələrinə məşvərətli səs hüquqlu komissiya üzvü təyin etmək səlahiyyəti olur", - o bildirib.
O, bütün müxalifət partiyalarının vahid təşviqat qrupu ətrafında birləşməsinin də müəyyən üstün cəhətlərinin olduğunu deyib. "Müxtəlif təşəbbüs qrupları yaranarsa, "Respublikaçılar" təşəbbüs qrupu onlarla sıx əməkdaşlıq və müttəfiqlik etməyi planlaşdırır", - Hacılı bildirib.
Hacılı bütün respublika üzrə təşviqat qrupu yaratmaq niyyətində olduqlarını deyib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992-ci il noyabrın 7-də Bakıda keçirilib. Gizli səsvermənin yekunları əsasında İsa Qəmbər əksəriyyət səslə partiyanın başqanı seçilib.
Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
Məqalə müəllifi ilə əlaqə ünvanı: [email protected]
