Iran, Tehran, 28 yanvar / Trend , müxbir A.Namdari/ İranın Milli, Ticarət və Parsayan banklarından 65 milyon 800 min dollar vəsaiti dələduzluq yolu ilə mənimsəyən şəxsə Tehran şəhər 1191 saylı Ümumi Məhkəməsində Hakim Əlirza Mirzapurun sədrliyi ilə keçirilən məhkəmədə hökm oxunub.
Tehran şəhər Ədliyyə idarəsinin ictimaiyyətlə əlaqələr şöbəsinin məlumatına əsasən, İranın Milli, Ticarət və Parsayan banklarının şikayəti əsasında, bu şəxs haqqında Tehran şəhər 1191 saylı Ümumi Məhkəməsində cinayət işi açılmışdı. Məlumatda həmin şəxsin nə vaxt, harada və necə həbs olunduğu barədə açıqlama verilməyib.
Təqsirləndirilən şəxs şirkət direktorudur. İranın Milli, Ticarət və Parsayan banklarına ölkəyə idxal edəcəyi məhsulların qiyməti haqda yanlış məlumat verərək, həmin banklardan külli miqdarda vəsait mənimsəyib.
Tehran şəhər 1191 saylı Ümumi Məhkəməsinin çıxardığı hökmə əsasən, fırıldaqçılıqda ittiham olunan şəxs 7 il müddətində şərti həbs cəzasına, dövlət fonduna 65.800.000 ABŞ dolları dəyərində nəğd yolla cərimə, İranın "Parsayan" Bankına 19 milyon 500 min ABŞ dolları, "Milli" Bankına 26 milyon 800 min ABŞ dolları, "Ticarət Bankı"-na 19 milyon 500 min ABŞ dolları dəyərində vəsayiti ödəmə cəzasına məhkum edilib.
Məhkəmə məhkum olunan şəxs haqqında ətraflı məlumat açıqlamayıb.