Azərbaycan, Bakı, 06 fevral / Trend , müxbir K.Zərbalıyeva/ Azərbaycanın Sumqayıt şəhərindəki (paytaxt Bakıdan 30 kilometr məsafədə) bağ evində cümə axşamı meyiti tapılmış Azərbaycanın Qubadlı rayonunun sabiq icra başçısının intihar etdiyi ehtimal olunur.
Sumqayıt Şəhər Prokurorluğunun müstəntiqi Elşad Eyvazov cümə günü Trend -a bildirib ki, Əvəz Hüseynquliyevin ölümünün səbəbi hələlik müəyyənləşməsə də, istintaq ilkin olaraq onun intihar etdiyi qənaətindədir.
Faktla bağlı hələlik cinayət işi başlanmadığını deyən müstəntiq mərhumun hansı səbəbdən intihar etdiyinin bəlli olmadığını bildirib.
Dünən saat 18.00 radələrində Sumqayıt şəhərində 17-ci yaşayış məhəlləsində, "Nərimanov klubu" deyilən ərazidəki bağ evində Hüseynquliyevin meyiti tapılıb.
İlkin məlumatlara görə, o, özünü ov tüfəngi ilə vurub.
Hüseynquliyev Qubadlının işğalından əvvəl bu rayonda kolxoz sədri vəzifəsində çalışıb. Sonradan Qubadlı rayon Dövlət Sosial Müdafiə Mərkəzinə rəhbərlik edib. 1995-ci ilin əvvəlində Qubadlı rayonuna icra başçısı təyin edilib. 2002-ci ildə işdən azad edilib.
Məqalə müəllifi ilə əlaqə ünvanı: [email protected]
...