Azərbaycan, Bakı, 02 mart / Trend , müxbir N.Abdullayeva /
İtaliyanın xarici işlər nazirinin müavini Alfredo Mantika Cənubi Qafqaz ölkələrinə səfəri çərçivəsində martın 2-3-də Bakıda Azərbaycan və İtaliya arasında ikitərəfli əməkdaşlığın gələcək inkişaf perspektivlərini müzakirə edəcək. Bu barədə bazar ertəsi Trend -a İtaliyanın Azərbaycandakı səfirliyindən məlumat verilib.
Azərbaycan və İtaliya arasında iqtisadi əməkdaşlıq üzrə hökumətlərarası komissiyasının həmsədri olan Mantika Bakıda ticari-iqtisadi, enerji və hümanitar sahələrdə iki ölkənin qarşılıqlı əlaqələrinin geniş spektrini müzakirə edəcək.
Diplomatik nümayəndəlikdən verilən məlumata görə, İtaliyanın xarici işlər nazirinin müavini səfər çərçivəsində energetika naziri, iqtisadi inkişaf nazirinin müavini ilə görüşəcək və Azərbaycanın Xarici İşlər Nazirliyində görüşlər keçirəcək.
Azərbaycan Dövlət Statistika Komitəsinin statistikasına əsasən, 2008-ci ildə Azərbaycan ilə İtaliya arasında mal dövriyyəsi 19,4 mlrd. dollar təşkil edib. Bu göstəricinin 19, mlrd. dolları Azərbaycandan ixracın, 0,188 mlrd. dolları isə idxalın payına düşüb.
Məqalə müəllifi ilə əlaqə ünvanı - [email protected]
