Azərbaycan, Bakı, 10 aprel / Trend , müxbir D.Xatınoğlu /
İranda prezident seçkilərinə nəzarət edən Ali Dini Nəzarət Şurası islahatçılar düşərgəsinin seçkilərdə saxtakarlığa yol veriləcəyi ilə bağlı narahatlıqlarına reaksiya olaraq bəyanat yayıb. Ali Dini Nəzarət Şurasının rəsmi saytında yayılan bəyanatda, iyunun 12-də keçiriləcək prezident seçkilərində hər hansı bir saxtakarlığa yol verilməyəcəyi vəd edib.
İran islahatçılar düşərgəsinin bir qoluna rəhbərlik edən prezidentliyə namizəd Mehdi Kərrubi, Ali Dini Şuranın baş katibi Əhməd Cənnətini hazırki Prezident Mahmud Əhmədinejadı müdafiə etməkdə ittiham edib. Kərrubi çərşənbə axşamı açıq məktubla Cənnətiyə müraciət edərək bildirib ki, "seçkilərdə hansısa bir saxtakarlıq olarsa, sizin Şuraya (Ali Dini Nəzarət Şurası) müraciət etmək lazımdır, sizin əlinizdən şikayət etmək üçün kimə müraciət edək", - Milli Etimad Partiyasının baş katibi Kərrubi bildirib.
Cənnəti bundan əvvəl, Əhmədinejadın prezidentlik dövründə ölkənin analoqu olmayan inkişafa nail olmasını dəfələrlə bildirib. O, İran xalqının düşmənlərinin "İranda Qərbə meylli namizədlərin prezident olmasına çalışmasını" və "rəngli inqilaba cəhdlərini" vurğulayaraq, xalqa xəbərdarlıq edib.
Sabiq islahatçı Prezident Məhəmməd Xatəminin müavini hesab edir ki, növbəti prezident seçkilərində saxtakarlığın olacağı ilə bağlı ciddi narahatlıq var.
Rəsmi məlumata əsasən, 2005-ci il prezident seçkilərində Mahmud Əhmədinejad 17 milyon səs toplamaqla prezident seçilib. Bu statistika digər namizədlər Kərrubi və Əkbər Rəfsəncaninin sərt etirazına səbəb olub. Rəfsəncani "bu saxtakarlıqdan Allaha sığındığını" bildirmişdi.
Xatəminin parlament məsələləri üzrə müavini Məhəmməd Əbtəhi (Mohammad Abtahi) Trend -a açıqlamasında bildirib ki, Cənnətinin bəyanatı növbəti prezident seçkiləri ilə bağlı islahatçılar düşərgəsinin narahatlığının artmasına səbəb olub.
Əbtəhi hesab edir ki, seçkilərdə saxtakarlığın qarşısını almaq üçün "bir sıra" vədlər verilib, lakin bunlar qənaətbəxş deyil.
Milli Etimad Partiyasının mərkəzi şurasının üzvu Əbulfəzl Şükuri (Abolfazl Şokuri) isə Trend -a açıqlamasında bildirib ki, keçən həftə Cənnəti seçkilərə nəzarət heyəti ilə keçirdiyi iclas zamanı verdiyi bəyanatda "açıq şəkildə" Əhməidinejadı dəstəkləyib. Onun sözlərinə görə, konstitusiyaya əsasən, Nəzarətçi Şuranın hər hansi bir namizədi müdaifə etməsi qanunsuzdur. "Cənnətinin bəyanatı qanuna zidd olduğu üçün Kərrubi açıq məktubla Ali Dini Nəzarət Şurasına müraciət edib", - Şükuri bildirib.
Hazırda islahatçılar düşərgəsindən iki nümayəndə namizədliyini irəli sürüb: eks-spiker Kərrubi və sabiq baş nazir Mir Hüseyn Musəvi (Mousavi). İslahatçıların əsas rəqibi konservativ (Üsulgəra) koalisiya hələlik öz namizədlərini elan etməyib.
Seçkilərə müdaxilə etməklə bağlı narahatlıqları səngitmək üçün İran Prezidenti Əhmədinejad aprelin 8-də İsfahan şəhərindəki çıxışında hakimiyyətin seçkilərə müdaxilə etməyəcəyini vəd edib. "Hakimiyyətdə olan heç bir rəsmi şəxs seçkilərlə bağlı bir saniyə də vaxt ayırmamalıdır" - deyə Əhmədinejad bildirib. Lakin İranın hazırkı Prezidentinin vədinə islahatçılar şübhə ilə yanaşır.
Şükuri hesab edir ki, hakimiyyət qarşısında böyük bir sınaq durur. "Ümid edirik ki, hakimiyyət seçkilərə müdaxilə etməməklə sınaqdan çıxacaq və hakimiyyət əlində olan vasitələrdən təbliğat üçün istifadə etməyəcək. Lakin Əhmədinejadın vədinin reallığa nə dərəcədə uyğun olması məlum deyil" - Şükuri cümə günü Tehrandan telefonla bildirib.
Əbtəhi isə bu barədə Əhmədinejadın bəyanatını dəstəklədiyini bildirib, lakin ümid edib ki, prezident vədlərini sözdə deyil, əməldə də göstərəcək. "Hazırki şəraitdə hakimiyyətin seçkilərə müdaxilə etməməsi ilə bağlı heç bir fakt görünmür və biz bu vədə şübhə ilə yanaşırıq", - Xatəminin parlament məsələri üzrə müavini hesab edir.
Keçən ay Xatəmi (Khatami) islahatçılar düşərgəsində səslərin dağılmasının qarşısını almaq üçün namizədliyini geri götürüb. Hazırda islahatçılar tərəfdarının hansı namizədi dəstəkləyəcəkləri də tam aydın deyil.
Əbtəhi bildirib ki, siyasi proseslər göstərir ki, islahatçıların əksəriyyəti Musəvini dəstəkləyir, lakin Kərrubini dəstəkləyənlərin də sayı az deyil. "Prezident seçkilərinə yaxınlaşdıqca hər şey aydın olacaq", - deyə Əbtəhi aprelin 10-da Tehrandan telefonla Trend -a bildirib.
Bu barədə Şükuri hesab edir ki, islahatçı namizədlərin hansının xalq tərəfindən daha çox dəstəklənəcəyi haqda ictimai sorğu aparılmayıb, lakin hər iki namizədin tərəfdarları olması faktdir. Onun sözlərinə görə, Xatəmi tərəfdarlarının əksəriyyəti Musəvi və Kərrubi arasında tərəddüd edirlər və hansı namizədi dəstəkləyəcəkləri haqda hələlik konkret qərar verməyiblər.
Məqalə müəllifi ilə əlaqə ünvanı: [email protected]