...

Azərbaycanda xarici ölkə vətəndaşlarına məxsus kredit kartlarından qanunsuz istifadə edən mütəşəkkil cinayətkar dəstə zərərsizləşdirilib

Siyasət Materials 15 May 2009 18:42 (UTC +04:00)
Azərbaycanda xarici ölkə vətəndaşlarına məxsus kredit kartlarından qanunsuz istifadə edən mütəşəkkil cinayətkar dəstə zərərsizləşdirilib

Azərbaycan, Bakı, 15 may / Trend , müxbir K. Zərbalıyeva /

Azərbaycan Milli Təhlükəsizlik Nazirliyi (MTN) tərəfindən keçirilən növbəti əməliyyat-axtarış tədbirləri nəticəsində, kompüter informasiyasına qanunsuz daxil olub xarici ölkə vətəndaşlarının kredit kartlarından gizli istifadə edərək, onların bank hesablarından elektron avia-biletlərin dəyərini ödəməklə əldə edilməsi və həmin biletlərin real dəyərindən ucuz qiymətə, nağd pula müxtəlif şəxslərə satılması və bu pulların talanması ilə məşğul olan Azərbaycan və xarici ölkələrin vətəndaşlarından ibarət transmilli mütəşəkkil cinayətkar dəstə ifşa olunaraq zərərsizləşdirilib.

Müəyyən edilib ki, Azərbaycan vətəndaşları - Şəmsəddin Abdurrəhmanov, Vaqif Mirzəzadə, Tahir Əmirquliyev, Elyar Qocazadə, Nazim Həsənov, Əhliman Məmmədov, Murad Mahmudov, Nigeriya Federativ Respublikasının vətəndaşı Mutiu Olovu və qeyriləri, habelə hazırda şəxsiyyətləri istintaqla araşdırılan xaricdə yaşayan əcnəbilər mütəşəkkil dəstənin tərkibində "Azərbaycan Hava Yolları" QSC-nin rəsmi www.azal.az İnternet səhifəsinə, yəni qanunla qorunan kompüter informasiyasına qeyri-qanuni daxil olub, ABŞ və digər xarici ölkə vətəndaşlarına məxsus kredit kartlarından qanunsuz istifadə ediblər. Məlum olub ki, cinayətkar dəstənin üzvləri həmin xarici vətəndaşların kredit kartlarındakı hesablarından gizli olaraq İnternetlə pul ödənişləri aparıb müxtəlif marşrutlar üzrə dəyərini ödəməklə elektron avia-biletlər əldə etmiş və bu biletləri real dəyərindən ucuz qiymətə, nağd pula digər şəxslərə satıb əldə etdikləri pulları talamışlar.

İstintaqla müəyyənləşdirilib ki, göstərilən hüquqazidd əməllər, yəni "Azərbaycan Hava Yolları" QSC-nin qanunla qorunan kompüter informasiyasına qanunsuz müdaxilə şirkətin işinin pozulmasına səbəb olmuş və bunun nəticəsində şirkətə 100 min manata yaxın zərər vurulmuşdur.

Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası Cinayət Məcəlləsinin 271.2.1-ci və 271.2.3-cü, (mütəşəkkil dəstə tərəfindən kompüter informasiyasına qanunsuz daxilolma ilə külli miqdarda ziyanvurma), 177.3.1-ci və 177.3.2-ci (mütəşəkkil dəstə tərəfindən özgənin külli miqdar əmlakını gizli talama) maddələri ilə cinayət işi başlanmış, Şəmsəddin Abdurrəhmanov, Vaqif Mirzəzadə, Tahir Əmirquliyev, Elyar Qocazadə, Nazim Həsənov, Əhliman Məmmədov, Murad Mahmudov, Mutiu Olovu təqsirləndirilən şəxs qismində cəlb olunaraq məhkəmənin qərarı ilə barələrində həbs qətimkan tədbiri seçilmişdir.

Məqalə müəllifi ilə əlaqə ünvanı: [email protected] 

Xəbər lenti

Xəbər lenti