Azərbaycan, Bakı, 19 iyun / Trend , müxbir S.Ağayeva/
"Azərbaycan və Küveyt ikitərəfli münasibətlərin inkişafına yönəldilmiş konstruktiv dialoqu davam etdirmək niyyətindədirlər. Danışıqlar Küveyt əmiri Şeyx Sabah əl-Əhməd as-Sabahın rəsmi səfərinin gedişində keçiriləcək", - cümə günü Trend -a Azərbaycanın Küveytdəki səfiri Şahin Abdullayev deyib.
Azərbaycan Prezidenti İlham Əliyev may ayında Küveytə səfəri zamanı bu ölkənin başçısını Bakıya dəvət edib.
"Hazırda Küveyt əmirinin ilin sonunda baş tutacağı ehtimal edilən səfərinə hazırlıq gedir. Bakıdakı danışıqlar zamanı iki ölkənin iqtisadi və siyasi əməkdaşlığının bütün aspektlərinə toxunulacağı gözlənilir", - Əl-Küveytdən səfir telefonla məlumat verib.
Səfirin sözlərinə görə, Küveyt Azərbaycana böyük maraq göstərir. İkitərəfli münasibətlərə xüsusi impulsu Azərbaycan Prezidenti İlham Əliyevin səfəri və bu səfər çərçivəsində imzalanmış hökümətlərarası müqavilələr verib. "Bu müqavilələr küveytli iş adamlarına Azərbaycanda işləmək üçün yaxşı imkanlar yaradır", - diplomat deyib.
"Hazırda stol üzərində hər iki tərəfin nəzərdən keçirdiyi bir neçə sərmayə layihəsi var", - səfir bildirib.
Azərbaycan Dövlət Statistika Komitəsinin məlumatına görə, 2009-cu ilin yanvar-aprel aylarında Azərbaycan və Küveyt arasında ticarət dövriyyəsi 336,1 min dollar təşkil edib. İdxal əməliyyatları həyata keçirilməyib.