Azərbaycan, Bakı 20 iyul / Trend , müxbir A.Hüseynbala /
Azərbaycanın hakim partiyası hər bir bələdiyyə üzrə bir namizəd irəli sürmək niyyətindədir.
"Biz çalışacağıq ki, bələdiyyələrdə maksimum üstünlüyü əldə edək və namizədlərimizin daha çox bələdiyyələrdə yer almasına nail olaq", - Trend -un məlumatına görə, bazar ertəsi jurnalistlərə Yeni Azərbaycan Partiyası (YAP) icra katibinin müavini Mübariz Qurbanlı bildirib.
Trend -un arayışı: Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Qurbanlının sözlərinə görə, indi seçki proqramı və əsas istiqamətlər üzrə şüarları müəyyənləşdirilir. "Ümidvarıq ki, apardığımız təşviqat işləri, digər görülən işlər, o cümlədən Prezident İlham Əliyevin həyata keçirdiyi siyasət və bu siyasətə səs verəcək insanlar YAP-ın simasında partiyamızın irəli sürdüyü namizədləri dəstəkləyəcək", - hakim partiya funksioneri əlavə edib.
İcra katibinin müavini deyib ki, partiya üzvlərinə bələdiyyə seçkilərində müstəqil şəkildə namizədliklərini irəli sürməmək tövsiyə ediləcək. "Çünki partiya öz namizədlərini irəli sürübsə, o zaman YAP-ın bir dairədə, bir məntəqədə iki namizədlə iştirak etməsi bir az anlaşılmazlıq yarada bilər. Hər halda, partiya üzvləri sərbəstdirlər, amma mən belə düşünürəm ki, partiya üzvü təşkilatın rəsmi namizədinin üzərindən öz namizədliyini irəli sürməyi məqsədəuyğun saymamalıdır", - Qurbanlı vurğulayıb.
YAP 1992-ci ildə о vаxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri Prezident İlham Əliyevdir.
Məqalə müəllifi ilə əlaqə ünvanı: [email protected]