Azərbaycan, Bakı, 18 sentyabr / Trend , müxbir A.Hüseynbala /
Azərbaycanın sol yönümlü partiyası bələdiyyə üzvlüyünə namizədlərin vahid siyahısını müəyyənləşdirməyəcək.
"Biz namizədlərin müəyyənləşdirilməsi üçün bütün şəhər və rayon təşkilatlarına tam sərbəstlik vermişik", - cümə günü Trend -a Azərbaycan Sosial-Demokrat Partiyasının (ASDP) həmsədri Araz Əlizadə bildirib.
Trend -un arayışı: Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Azərbaycanda bələdiyyələrin birləşdirilməsi prosesi nəticəsində onların sayı 2760-dan 1720-ə qədər enib.
Əlizadənin sözlərinə görə, bələdiyyə üzvlüyünə namizədlərin müəyyən edilməsi üçün bu qaydanın seçilməsinin iki səbəbi var: "Birincisi, bu prosesə partiyanın Mərkəzi Aparatının rəhbərlik etməsi üçün maliyyə vəsaitimiz çatışmır. İkincisi, bələdiyyə üzvlüyünə kimin daha şanslı olub-olmadığını yerli təşkilatların rəhbərləri daha yaxşı bilirlər", - partiyanın həmsədri əlavə edib.
Əlizadə bələdiyyə üzvlüyünə sosial-demokratlardan nə qədər namizəd irəli sürüləcəyinin hələ ki, dəqiqləşdirilmədiyini deyib. "Bizim üçün əsas məsələ bacarıqlı və təcrübəli insanların yerli özünüidarəetmə orqanlarına seçilməsidir", - ASDP həmsədri vurğulayıb.
Məqalə müəllifi ilə əlaqə ünvanı: [email protected]
