Azərbaycan, Bakı, 6 iyul /Trend, müxbir E.Tarıverdiyeva/
Dövlət katibi Hillari Klintonun Gürcüstana səfəri Ağ evin ABŞ-Rusiya münasibətlərinin "yenidən yüklənməsi" üzrə siyasətinə təsir etməyəcək. Hazırkı administrasiyanın Gürcüstanda və ümumilikdə Qafqazdakı siyasəti bundan əvvəlki administrasiyanın siyasətindən fərqlənəcək. Ekspertlər belə hesab edirlər.
"Vaşinqtonun vəziyyətinin mürəkkəbliyi ondadır ki, Gürcüstana görə Moskvaya münasibətdə mövqeləri sərtləşdirmək mümkündür. Lakin bu, Rusiya-ABŞ münasibətlərinin yenidən yüklənməsi məntiqinin özü ilə kəskin ziddiyyət təşkil edəcək", - MDU-nin Tarix fakültəsinin dekan müavini, "Vestnik Kavkaza" internet-portalın baş redaktoru, Trend-in Ekspert Şurasının üzvü Aleksey Vlasov bildirib.
Gürcüstan ABŞ dövlət katibi Hillari Klintonun Şərqi Avropa ölkələrinə beşgünlük səfərinin yekun nöqtəsi olub.
"Gürcüstan bizim dostumuz, tərəfdaşımızdır, biz onu həm dinc, həm də müharibə dövründə dəstəkləyirik. Mən Gürcüstana ABŞ Prezidentinin məktubu ilə gəlmişəm. Orada bizim Gürcüstanın suverenliyi və ərazi bütövlüyünü möhkəm dəstəklədiyimizdən danışılır", - Klinton deyib.
Ekspertlərin fikrincə, Klintonun Gürcüstandakı bəyanatının xarakterinə və rus qoşunlarının Abxaziya və Cənubi Osetiyadan çıxarılması barədə çağırışa baxmayaraq, bu, Ağ evin ABŞ-Rusiya münasibətlərinin "yenidən yüklənməsi" üzrə siyasətinə təsir etməyəcək. Vlasov hesab edir ki, hətta əgər hansısa sərtləşmə baş verərsə, bu, maksimum yumşaq formada ifadə olunacaq.
"ABŞ-ın Cənubi Qafqazda aktivliyi regionun özü ilə deyil, daha çox İran və Əfqanıstanla bağlıdır. Və burada Buşun dövründəkindən tam fərqli oyun aparılır", - Vlasov Moskvadan telefonla Trend-ə bildirib.
Cənubi Qafqaz üzrə amerikalı ekspert Maykl Qunter hesab edir ki, ABŞ-ın Cənubi Qafqaz regionunda apardığı siyasət xarakteri əvvəlki administrasiyanın siyasətindən fərqlənəcək.
"Hesab edirəm ki, ABŞ əvvəlki dövrlərdə fəaliyyət göstərən Buş administrasiyası ilə müqayisədə regionda daha əhəmiyyətli rol oynayacaq", - Trend-ə elektron poçtla ABŞ-ın Tennesi Texnoloji Universitetinin siyasi elmlər professoru, amerikalı ekspert Gunter bildirib.
Cənubi Qafqaz üzrə amerikalı ekspert Mark N.Katsın fikrincə, ABŞ fəaliyyət üçün Cənubi Qafqazda Rusiya ilə əməkdaşlıq edə biləcək məsələləri məqsədyönlü şəkildə seçəcək.
"Mən belə hesab edirəm ki, Barak Obama administrasiyası Gürcüstan problemindən daha çox Dağlıq Qarabağ problemi üzərində çalışmağa üstünlük verir, belə ki, Dağlıq Qarabağ ABŞ və Rusiyanın əməkdaşlıq edə biləcəyi məsələdir, Gürcüstan isə, əksinə, fikir ayrılığı obyektidir", - Trend-ə Corc Meyson Universitetinin Beynəlxalq münasibətlər departamentinin siyasət üzrə professoru Kats elektron poçtla bildirib.
"ABŞ dövlət katibi Hillari Klintonun Cənubi Qafqaz ölkələrinə səfəri Vaşinqtonun regionun sabitliyində maraqlı olduğuna sübutdur", - ekspert Andro Barnov belə hesab edir. Məlumatı "Georgia online" yayıb.
Onun sözlərinə görə, bu səfər regionda vəziyyəti gərginləşdirməyə və Avrasiyanın cənub hissəsini hissələrə bölməyə çalışan oyunçulara mühüm müraciət hesab olunur. Ekspert qeyd edib ki, ABŞ Gürcüstana işğal olunmuş ərazi problemlərinin həlli üçün şərait yaradılmasına yardım edəcək.
Lakin gürcü müşahidəçilərinin fikrinə görə, Klintonun səfəri əksinə, ABŞ-ın "yenidən yüklənmə" siyasətində ümidsizliyindən xəbər verir.
Gürcü ekspert Nika Çitadze hesab edir ki, ABŞ Rusiya ilə "yenidən yüklənmə" siyasətində tədricən məyus olur və Moskvaya qarşı daha sərt rəftar edir. "Bu məqamda regiona səfər daha əhəmiyyətli xarakter alır və söhbət regionda ABŞ-ın rolunun gücləndirlməsindən gedə bilər ki, burada da Vaşinqtonun etibarlı tərəfdaşı Tbilisidir", - Trend-ə Çitadze bildirib.
Tbilisiyə ABŞ dövlət katibi Hillari Klintonun səfəri və onun verdiyi bəyanatlar Gürcüstanın təhlükəsizliyi baxımından böyük əhəmiyyətə malikdir. Bu barədə çərşənbə axşamı brifinqdə Gürcüstan xarici işlər nazirinin birinci müavini Georgi Bokeriya bildirib.
"Bu səfər cəmiyyətdə formalaşan Rusiya-ABŞ münasibətlərinin "yenidən yüklənməsindən" Gürcüstanın zərər çəkməsi fikri ilə bağlı qorxuları ləğv etdi, lakin birinci plana Gürcüstanın işğaldan azad edilməsi məsələsinin çıxması bu qorxuları gündəlikdən çıxardı. Biz sadəlövh deyilik və hər şeyin bir anda həll edilməsi ilə bağlı xəyalımız yoxdur. Rusiya addım-addım geri çəkilməli olacaq", - Bokeriya bəyan edib.
Onun sözlərinə görə, Birləşmiş Ştatlar Gürcüstanın suverenliyini dəstəkləyir.
"Bəzi tənqidçilərin Gürcüstan-NATO münasibətləri ilə bağlı təsəvvürləri puça çıxdı. Gürcüstanın NATO-ya daxil olması məsələsi ABŞ-ın maraqlarının gündəliyində durur", - Bokeriya bildirib.
Lakin Hadson İnstitutunun (Hudson Institute) baş elmi əməkdaşı və "World Politics Review"nun baş redaktoru Riçard Vays hesab edir ki, Gürcüstanın NATO-ya irəliləməsi mübahisəli məsələ olaraq qalmaqdadır.
"Hazırkı administrasiyanın əvvəlki administrasiyanın etdiyi kimi, Gürcüstanı NATO-ya sürükləməsi hələ ki tam aydın deyil", - Trend-ə elektron poçtla Vays bildirib.
Materialın hazırlanmasında V.Javoronkova (Bakı), N.Kirsxaliya (Tbilisi) iştirak ediblər.
