Azərbaycan, Bakı, 9 oktyabr /Trend, müxbir E.Tarıverdiyeva/
Bakıda oktyabrın 11-12-də MDB, Qafqaz və Qara dəniz üzrə "Sosialist İnternasional"ı komissiyasının iclası keçiriləcək. Bu barədə Trend-ə Azərbaycan Sosial-Demokrat Partiyasının rəhbəri Araz Əlizadə deyib.
Onun sözlərinə görə, iclasda regional münaqişə, region ölkələrinin inkişafı və regionda sosial-demokrat inkişaf imkanları məsələlərinin müzakirəsi üçün Avropa və regionun sosial və sosial-demokrat partiyalarının nümayəndələri iştirak edəcəklər.
"Sosial İnternasional"ın baş katibi Luis Ayala da komissiyanın iclasında iştirak etmək üçün Bakıya gələcək", - Əlizadə deyib.
Bundan əvvəl KİV-in verdiyi məlumata görə, iclasda Ermənistanın daşnaksütun partiyası da iştirak etmək istəyini bildirib.
Partiyanın mətbuat xidmətinin məlumatına əsasən, "Ermənistan daşnaksütun partiyasının iştirakına zəmanət vermir, çünki Tbilisi-Bakı reysinə uçuş biletlərinin satılması üçün "AZAL" Şirkətinin Tbilisidəki ofisi səfirlik və ya Azərbaycan XİN-dən uçuşa icazə tələb edir.
Məlumatı "PanARMENIAN.Net." saytı yayıb.
Lakin Azərbaycanın Tbilisidəki Səfirliyindən Trend-ə verilən məlumata görə, heç kim səfirliyə belə bir xahişlə müraciət etməyib. Həmçinin, Azərbaycan XİN nümayəndəsi Trend-ə bildirib ki, Ermənistan tərəfdən daşnaksütun partiyasının fəaliyyəti barədə heç bir müraciət daxil olmayıb.