Azərbaycan, Bakı, 14 oktyabr /Trend, müxbir S.Süleymanov/
Qazaxıstan parlamenti ATƏT-ə sədrlik çərçivəsində MDB-nin Parlamentlərarası Assambleyası ilə birgə Sankt-Peterburqda "ATƏT və MDB: yeni imkanlar və perspektivlər" mövzusunda parlamentlərarası konfrans keçirmək barədə qərar qəbul edib. Bu barədə Məclisin beynəlxalq məsələlər, müdafiə və təhlükəsizlik komitəsinin sədri Amzebek Jolşibekov cümə axşamı Astanadakı brifinqdə məlumat verib.
Konfrans oktyabrın 25-nə planlaşdırılıb. Bura MDB-yə daxil olan bütün dövlətlərin parlament nümayəndə heyətləri, eləcə də ATƏT Parlament Assambleyası, Parlamentlərarası İttifaq, AŞ PA, Türkdilli Ölkələrin Parlament Assambleyası, bir sıra beynəlxalq təşkilatlardan, o cümlədən Avrasiya İqtisadi Cəmiyyəti və Şanxay Əməkdaşlıq Təşkilatından nümayəndələr dəvət edilib.
"Bu gün adını çəkdiyim təşkilatlardan 300-dən artıq nümayəndə konfransda iştirak edəcəklərini təsdiqləyiblər. Artıq ərizə verən 30-dan artıq iştirakçının çıxış edəcəyi gözlənilir", - Jolşibekov bildirib.
Onun sözlərinə görə, konfransda Azərbaycan Parlamentinin nümayəndə heyəti də iştirak edəcək.
Konfrans əsas plenar hissə ilə yanaşı, üç bölmədən ibarət olacaq. "Avro-Atlantika və Avrasiya təhlükəsizliyi" adlı birinci bölmədə Avropada təhlükəsizlik haqqında müqavilə, Əfqanıstan və Qırğızıstandakı vəziyyət, postsovet məkanındakı həlli yubanan münaqişələr, kütləvi qırğın silahlarının yayılmaması məsələləri müzakirə olunacaq.
"Dünya iqtisadi düzəninin yeni arxitekturası" adlı ikinci bölmə dünya maliyyə-iqtisadi böhranı, postsovet məkanına inteqrasiya, gömrük ittifaqı, ATƏT-in yeni Bonn sənədi, iqlim dəyişiklikləri, nəqliyyat və enerji siyasətinə həsr olunacaq.
Üçüncü bölmə ATƏT-in istiqamətlərindən biri olan "İnsan ölçüləri"nə həsr olunacaq. İslasda tolerantlıq, seçki standartları, sərbəst hərəkət (yerdəyişmə) və viza rejimlərinin liberallaşdırılması, gender bərabərliyi və əmək miqrasiyası məsələlərinə toxunulacaq.