Azərbaycan, Bakı, 8 dekabr /Trend, müxbir A.Axundov/
Ankara ilə Təl-Əviv arasında əvvəlki münasibətlərin bərpası yalnız İsraildən asılıdır. Türkiyə parlamentinin hakim Ədalət və İnkişaf Partiyasından olan deputatı, Türkiyə-Livan parlamentlərarası dostluq qrupunun sədri Əbdürrəhman Kurt belə hesab edir.
"İsrail öz siyasətini dəyişərsə, əvvəlki münasibətlərin bərpası mümkün olar. Biz yalnız onların doqquz Türkiyə vətəndaşını öldürdükdən sonra etməli olduqlarını gözləyirik. Hazırkı şəraitdə heç bir əməkdaşlıq və dostluq ola bilməz", - Kurt telefonla Ankaradan Trend-ə bildirib.
Yaxın keçmişədək hərbi-siyasi sahədə sıx əməkdaşlıq edən Türkiyə ilə İsrail arasında münasibətlər mayın 31-də İsrail hərbçilərinin Qəzzaya humanitar yük aparan "Azadlıq donanması"na hücumundan sonra kəskin pisləşib. Doqquz Türkiyə vətəndaşının həlak olduğu bu hücumun ardından Türkiyə hökuməti İsraillə münasibətlərə yenidən baxacağını elan edib və İsraildən Türkiyə vətəndaşlarının həlak olması ilə bağlı rəsmi üzr istəməsini və həlak olanların ailələrinə təzminatın ödənilməsini tələb edib.
Kurtun sözlərinə görə, iki ölkə arasında münasibətlərin yaxşılaşması üçün yeganə yol İsrailin öz günahlarını etiraf etməsidir.
"Bizim tələbimiz aydın və humanistdir. Biz üzrxahlıq və təzminat tələb edirik. İsrail öz günahını və səhvini etiraf etməlidir", - Kurt bildirib.
Bundan əvvəl Türkiyənin Baş naziri Rəcəb Tayyib Ərdoğan və Prezidenti Abdullah Gül də Türkiyənin İsraildən üzrxahlıq və təzminat gözlədiyini bildiriblər.
Ərdoğanın sözlərinə görə, Türkiyənin yanğınların söndürülməsi zamanı kömək göstərməsi ikitərəfli münasibətlərin bərpasına yardım edə bilər, lakin bu, məsələni sonadək həll edə bilməz.
"Biz əvvəllər dəfələrlə bəyan etmişik ki, əgər tələblərimiz təmin olunmasa, ölkələrimiz arasındakı münasibətlər əvvəlki kimi qalacaq. Onlardan bəziləri yerinə yetirilib, lakin hamısı yox", - Ərdoğan bildirib.
Türkiyə Baş nazirinin bəyanatı israilli həmkarı Benyamin Netanyahu ilə telefon söhbətinin ardından səsləndirilib. İsrailin Baş naziri ölkəsindəki meşə yanğınlarının söndürülməsi üçün iki yanğınsöndürən təyyarənin ayrılması barədə tapşırıq verən Ərdoğana göstərilən köməyə görə təşəkkürünü bildirib.
Kurtun sözlərinə görə, İsraildəki yanğınların söndürülməsinə kömək etməklə Türkiyə öz insani borcunu yerinə yetirib.
"Biz bunu heç bir etnik, dini və başqa ayrı-seçkilik baxışları olmadan edirik", - o bildirib.