Azərbaycan, Bakı, 26 sentyabr /Trend, müxbir A.Tağıyeva/
Türkiyədə terrorun yayılmasında terror təşkilatları ilə danışıqlar aparan Ərdoğan hökuməti günahkardır. Trend-in məlumatına görə, bunu bazar ertəsi Türkiyənin müxalif Cümhuriyyət Xalq Partiyasının (CHP) lideri Kamal Kılıcdaroğlu deyib. Məlumatı CNN Türk telekanalı yayıb.
Kılıcdaroğlu ölkə hakimiyyətini Türkiyəni terrora məruz qoyan məsuliyyətsizlikdə də günahlandırıb.
Kürdüstan İşçi Partiyası (PKK) ötən həftə ölkə paytaxtında dövlət idarəsinin yaxınlığında baş vermiş və 3 nəfərin ölümü, 34 nəfərin yaralanmasına səbəb olan partlayışın məsuliyyətini öz üzərinə götürüb.
Türkiyənin PKK ilə münaqişəsi 25 ildən çoxdur davam edir. Münaqişədə indiyədək 40 mindən çox adam ölüb. Partiya BMT və Aİ tərəfindən terror təşkilatı kimi tanınıb.
Ötən həftə Türkiyə SQ Baş Qərargahı bəyanat verib ki, İraqın şimalındakı PKK mövqelərinə hava zərbələri davam edəcək.
Türkiyə HHQ avqustun 17-si axşam yaraqlıların Türkiyənin şimal-şərqində törətdikləri hücumdan sonra Şimali İraqda Kürd İşçi Partiyasının (PKK) terrorçularının mövqelərinə aviazərbələr endirib. Həmin hücum nəticəsində 9 türk hərbiçisi öldürülmüşdü.
Bu, Türkiyənin bir ildən artıq müddət ərzində İraqın şimalına endirdiyi ilk zərbələrdir.
Avqustun 17-dən Türkiyə aviasiyası PKK bazaları və yaraqlılarının məhv edilməsi üçün 58 hava reydi keçirib və 152 hədəf vurulub.
Hərbçilərin məlumatına görə, avqust ayı ərzində təxminən 300 terrorçu məhv edilib.
