Azərbaycan, Bakı, 3 noyabr /Trend, müxbir E.Mehdiyev/
Mərkəzi Seçki Komissiyasının sədri Məzahir Pənahov noyabrın 3-də Rusiya Federasiyasının ölkəmizdəki fövqəladə və səlahiyyətli səfiri Vladimir Doroxini qəbul edib.
Mərkəzi Seçki Komissiyasının mətbuat xidmətindən cümə axşamı Trend-ə verilən məlumata görə, MSK sədri Azərbaycanla Rusiya arasında ikitərəfli münasibətlərin dinamik və səmərəli şəkildə inkişaf etdiyini bildirib və iki ölkənin ali seçki qurumlarının arasında münasibətlərin də yüksək səviyyədə olduğunu qeyd edib.
Sədr Azərbaycan Mərkəzi Seçki Komissiyası ilə və Rusiya Federasiyası MSK arasında 2000-ci ilin 13 oktyabrında imzalanmış "Seçki strukrturlarının fəaliyyətini təkmlilləşdirmək məqsədilə qarşılıqlı faydalı əməkdaşlığı təmin etmək sahəsində Azərbaycan Respublikası Mərkəzi Seçki Komissiyasının və Rusiya Federasiyasının niyyət Protokolu"nun qarşılıqlı təcrübə mübadiləsinə hərtərəfli şərait yaratdığını vurğulayıb. O, hər iki qurum arasında peşəkar səviyyədə təcrübə mübadiləsinin və qarşılıqlı faydalı əməkdaşlığın mövcud olduğunu qeyd edib və bundan sonrakı münasibətlərin də yüksələn xəttlə inkişaf edəcəyinə əmin olduğunu bildirib.
Azərbaycan MSK sədri bəzi bələdiyyələrə keçiriləcək təkrar, əlavə və yeni seçkilərə hazırlıq barədə də məlumat verib.
Səmimi qəbula görə təşəkkürünü bildirən səfir Azərbaycan Respublikasında başqa sahələrlə yanaşı, seçkilərlə bağlı da böyük nailiyyətlərin əldə edildiyini vurğulayıb. O, təmsil etdiyi ölkənin Mərkəzi Seçki Komissiyası ilə Azərbaycan Respublikası MSK arasındakı səmimi münasibətlərdən məmnun olduğunu bildirib.
Görüşdə gələcək əməkdaşlığın perspektivləri, qarşılıqlı maraq doğuran məsələlər barədə də müzakirələr aparılıb.