Azərbaycan, Bakı, 25 may /Trend/
Rusiya yaxın xarici ölkələrdə raket hücumundan xəbərdarlıq üzrə "Voronej" tipli yeni radiolokasiya sisteminin yerləşdirilməsini planlaşdırmır. Bu barədə jurnalistlərə bu gün RF Hava-Kosmik Müdafiə Qoşunlarının komandanı, general-leytenant Oleq Ostapenko məlumat verib.
"Bizim tərəfdar olduğumuz belə bir konsepsiya var. Bu, stansiyaların hər şeydən əvvəl bizim ərazimizdə /döyüş növbətçiliyi üzrə/ təşkil olunmasıdır", - Ostapenko İrkutsk vilayətinin Usol-Sibirsk qəsəbəsndə yeni RLS-in təcrübə-döyüş növbəsinə qoyulması mərasimindən sonra bildirib.
Trend-in məlumatına görə, İTAR-TASS müxbirinin bu tip RLS-in MDB ölkələrində, o cümlədən Ermənistanda və Moldovada yerləşdirilməsinin mümkünlüyü ilə bağlı sualına komandan belə cavab verib: "Bu məsələyə qətiyyən baxılmır".
RF Müdafiə Nazirliyinin məlumatına görə, hazırda Rusiya Belarus (Baranoviçi), Azərbaycan (Qəbələ) və Qazaxıstandakı (Balxaş) RLS-dən istifadə edir.