Azərbaycan, Bakı, 3 mart /Trend/
Misirin Əl-Mənsur şəhərində baş vermiş kütləvi qarşıdurmada bir nəfər ölüb, onlarla insan yaralanıb. Trend-in RBK-ya istinadən yaydığı məlumatda deyilir ki, həlak olmuş Xossam Abdulla Abdeləzim gənc olub.
Şahidlərin sözlərinə görə, o, polisin kütləyə təzyiqləri nəticəsində ölüb.
Məlumatda deyilir ki, daha bir etiraz aksiyası Port-Səid şəhərində baş tutub.
Aksiyada həbs olunmuşların azad edilməsini tələb edən etirazçılar polis məntəqəsini daşa tutub, binaya "molotov kokteyl"ləri atıblar.
Port-Səid şəhərindəki aksiyanın nəticələri haqqında geniş məlumat verilmir.
Qeyd edək ki, Əl-Mənsur və Port-Səid şəhərlərindəki aksiyalar ABŞ dövlət katibinin Misirə səfəri fonunda baş tutub.