...

Azərbaycan Respublikasının Prezidenti Balakəndə Mədəniyyət Mərkəzinin açılışında iştirak edib (FOTO)

Siyasət Materials 17 Avqust 2013 12:14
Azərbaycan Respublikasının Prezidenti İlham Əliyev avqustun 17-də Balakən Rayon Mədəniyyət Mərkəzinin açılışında iştirak etmişdir.
Azərbaycan Respublikasının Prezidenti Balakəndə Mədəniyyət Mərkəzinin açılışında iştirak edib (FOTO)

Trend-i buradan izləyin

Azərbaycan, Bakı, 17 avqust /Trend/

Azərbaycan Respublikasının Prezidenti İlham Əliyev avqustun 17-də Balakən Rayon Mədəniyyət Mərkəzinin açılışında iştirak etmişdir. Dövlətimizin başçısı mərkəzin rəmzi açılışını bildirən lenti kəsdi.

Son illərdə Azərbaycanda mədəniyyətin inkişafına göstərilən qayğı daha da artmış, bu sahədə çalışanların iş şəraitini günün tələbləri səviyyəsinə çatdırmaq üçün məqsədyönlü tədbirlər həyata keçirilmişdir. Mədəniyyətin və incəsənətin inkişafına diqqət yeni mədəniyyət ocaqlarının inşasında da özünü büruzə verir. Bu tədbirlər paytaxtla yanaşı, regionlarda da geniş vüsət almışdır. Son dövrlərdə bölgələrdə müasir tipli yeni mədəniyyət infrastrukturu yaradılmış, çoxlu sayda mədəniyyət obyektləri tikilib istifadəyə verilmişdir. Balakəndə inşa olunan Mədəniyyət Mərkəzi də bu sırada mühüm yer tutur.

Dövlətimizin başçısına məlumat verildi ki, mərkəzin tikintisinə 2012-ci ilin iyulunda başlanmışdır. Təmir zamanı işlərin yüksək səviyyədə görülməsinə xüsusi diqqət yetirilmişdir. Binanın ətrafında geniş abadlıq və yaşıllaşdırma işləri görülmüşdür. Bunun nəticədir ki, indi mərkəzin binası rayonun gözəlliyinə əlavə çalarlar qatır. Yeni mədəniyyət obyektlərinin inşası, mövcud olanlarının yüksək səviyyədə bərpa olunması, müasir avadanlıqla təchiz edilməsi dövlətin mədəniyyətin inkişafına göstərdiyi qayğının bariz nümunəsidir. Görülən bütün tədbirlər bu gün mədəniyyət və incəsənət sahəsinin hərtərəfli inkişafına böyük stimul vermişdir.

Binanın foyesində ulu öndər Heydər Əliyevin, Prezident İlham Əliyevin və Heydər Əliyev Fondunun prezidenti Mehriban xanım Əliyevanın mədəniyyətin inkişafına diqqət və qayğılarını əks etdirən fotostend yaradılmışdır. İkimərtəbəli binanın ümumi sahəsi 3 min 244 kvadratmetrdir. Mərkəzdə yaradılan 381 kvadratmetrlik tamaşa zalında müxtəlif mədəni tədbirlərin yüksək səviyyədə keçirilməsi üçün hər cür şərait yaradılmışdır. Müasir akustika sistemi ilə təchiz edilən 260 yerlik tamaşa zalının səhnəsi 121 kvadratmetrdir. Mərkəzdə yeməkxana, texniki və xidməti otaqlar da yaradılmışdır. Binanın ikinci mərtəbəsində isə müxtəlif dərnəklər fəaliyyət göstərəcəkdir. Burada rəsm zalı, heykəltəraşlıq, əmək, rəqs, musiqi dərnəkləri otaqları və müəllimlər otağı vardır. Mərkəzdə yaradılan şərait rayonun mədəniyyət və incəsənət işçilərinə yüksək səviyyədə fəaliyyət göstərməyə imkan verir.

Mərkəzlə tanışlıqdan sonra dövlətimizin başçısı Balakən rayon ictimaiyyətinin nümayəndələri ilə görüşdü.

Rayon ictimaiyyəti adından çıxış edən Səbuhi Alqayev Balakənin inkişafına göstərdiyi diqqət və qayğıya görə Prezident İlham Əliyevə minnətdarlıq etdi.

Məqalədə:
Xəbər lenti

Xəbər lenti