Bakı. Trend:
ABŞ Mərkəzi Asiyadan malların ixracının Rusiya və Çindən deyil, alternativ yollarla, o cümlədən Azərbaycandan keçməsini istəyir.
Trend-in cümə axşamı verdiyi məlumata görə, bu barədə ABŞ dövlət katibinin Avropa və Avrasiya məsələləri üzrə köməkçisi Ceyms O’Brayn deyib.
“Bu, bütün Mərkəzi Asiya regionuna aiddir; bu ölkələrin dünya bazarlarına ixracı indi yalnız Çin və Rusiyadan keçir. Başqa marşrutdan istifadə etmək üçün Azərbaycanla əməkdaşlıq etməlidirlər. Bir marşrut Gürcüstandan Qara dənizə keçir, digəri isə potensial olaraq daha böyük marşrut Azərbaycan, Ermənistan və Türkiyədən keçəcək və bu səbəblərə görə Azərbaycan və Ermənistan arasında sülh sazişinə ehtiyacımız var”, - deyə diplomat izah edib.
Qeyd edək ki, Ceyms O’Brayn iyunun 27-29-da Azərbaycan və Xorvatiyaya səfər edəcək.
Bakıda dövlət katibinin köməkçisi yüksək vəzifəli dövlət rəsmiləri ilə görüşəcək. O, ABŞ-Azərbaycan ikitərəfli münasibətlərindəki irəliləyişləri və Vaşinqtonun Azərbaycan və Ermənistan arasında sülh sazişini dəstəklədiyini vurğulayacaq.