Bakı. Trend:
Türkiyə Azərbaycanın sabit inkişafı və təhlükəsizliyini dəstəkləməyə bundan sonra da sadiqdir.
Trend xəbər verir ki, bu barədə Türkiyənin milli müdafiə naziri Yaşar Güler Yeni il münasibətilə paylaşdığı müraciətində bildirib.
Nazir vurğulayıb ki, Ankara və Bakının siyasəti “Bir millət, iki dövlət” tezisinə əsaslanır. “Biz təhlükəsizlik və əmin-amanlıq məsələlərində Türkiyə ilə Azərbaycan arasında heç bir fərq qoymuruq. Azərbaycandakı qardaşlarımızın yanında olmuşuq və həmişə olacağıq,” – deyə Yaşar Güler qeyd edib.
Türkiyənin milli müdafiə naziri iki ölkə arasında tarixi dostluq və qardaşlıq bağlarını xüsusi vurğulayıb.
Həmçinin, nazir “Azərbaycan Hava Yolları”na (AZAL) məxsus təyyarənin qəzaya uğraması ilə bağlı başsağlığı verib.
“Dekabrın 25-də Bakı-Qroznı reysi ilə uçan AZAL-a məxsus təyyarənin qəzaya uğraması nəticəsində çoxlu sayda insanın həlak olması dərin hüzn doğurur. Həlak olanların doğmalarına, yaxınlarına, dost və qardaş Azərbaycan xalqına dərin başsağlığı veririk. Yaralıların tezliklə sağalacağına ümid edirik,” – deyə Yaşar Güler bildirib.