Azərbaycanın xarici işlər nazirliyi BMT-də Kiprin türk icmasından beynəlxalq təcridin götürülməsi təşəbbüsü ilə çıxış edəcək.Həmin qərar Şimali Kipr Türk Cümhuriyyəti (ŞKTC) nümayəndə heyətinin Bakıya səfəri çərçivsəində qəbul edilib.
Trend Şimali Kipr KİV-ə istinadən bildirir ki, həmin bəyanatı ŞKTC-nin baş naziri Fərdi Sabit Soer Şimali Kipr nümayəndə heyətinin Bakıya səfərinin yekunlarını şərh edərkən bildirib. "Bu, çox mühüm addımdır və biz bu xəbəri çox məmnunluqla qəbul etdik"-deyə F.S. Soer vurğulayıb.
O, bildirib ki, Azərbaycanda keçirilən danışıqlar "iqtisadi xarakter" daşıyıb. "Səfər "sırf iqtisadi" səfərdir və Bakıdakı görüşün siyasi istiqamətinə dair hər-hansı bəyanatlar səhv və yersizdir"-deyə hökumət sədri bildirib.
F.S. Soerin sözlərinə görə, ŞKTC-dən Azərbaycana birbaşa təyyarə reysi Kiprin türk icmasının iqtisadi, sosial və mədəni təcriddən çıxışına xidmət edir.
"Birbaşa təyyarə reysi və səfər anlayışlarını aydın müəyyən etmək lazımdır"-deyə baş nazir qeyd edib və bildirib ki, Azərbaycan prezidenti İlham Əliyev ŞKTC-nin qurucusu və keçmiş prezidenti Rauf Denktaşın adına xüsusi dəvətnamə göndərib.
"Bu, çox minnətdarlıqla qəbul edilib". "R. Denktaşın Bakıya səfəri özəl xarakter daşıyırdı"-deyə F.S. Soer vurğulayıb və qeyd edib ki, Kipr Türk hava yolları şirkətinin həyata keçirdiyi birbaşa reyslərin müntəzəm olması üçün mümkün olan hər bir şeyi etmək lazımdır.