AZƏRBAYCAN PAKİSTANDA ZƏLZƏLƏDƏN ZƏRƏR ÇƏKƏNLƏRƏ $500 MİN MALİYYƏ YARDIMI GÖNDƏRƏCƏK
Azərbaycan Pakistanda zəlzələdən zərər çəkənlərə 500 min ABŞ dolları məbləğində maliyyə yardımı ayıracaq. Fövqəladə Vəziyyətlər üzrə Dövlət Komitəsindən Trend ə verilən məlumata görə, bu göstərişi Azərbaycanın prezidenti İlham Əliyev Pakistanda çoxlu sayda insan tələfatına və dağıntılara səbəb olmuş zəlzələ ilə əlaqədar olaraq verib.
Bununla yanaşı, Azərbaycanın Pakistana həkim və xilasetmə briqadaları göndərməsinə hazır olduğu da qeyd olunub. Ölkənin Səhiyyə Nazirliyinə və Müdafiə Nazirliyinin mülki müdafiə İdarəsinə xüsusi briqadaların yüksək hazırlıq vəziyyətinə gətirilməsi tapşırılıb. Pakistan hökumətinin razılığı alınan kimi, həkim və xilasetmə briqadasları xüsusi aviasiya reysi ilə zəlzələ zonasına göndəriləcək.
Qeyd edək ki, oktyabrın 9-da Azərbaycan prezidenti İlham Əliyev Pakistan prezidenti Pərviz Müşərrəfə başsağlığı məktubu göndərib. Məktubda bildirilir: "Sizin ölkənizdə baş vermiş güclü zəlzələ nəticəsində çoxsaylı insan tələfatı və dağıntılar barədə xəbər məni dərindən kədərləndirdi. Bu dəhşətli fəlakətlə əlaqədar Sizin kədərinizi bölüşür və bütün Azərbaycan xalqı adından Sizə, həlak olanların ailələrinə və yaxınlarına, qardaş Pakistan xalqına dərin hüznlə başsağlığı verir və yararlılarn sağalmasını və zəlzələnin nəticələrinin tezliklə aradan qaldırılmasını arzu edirəm".
