Milli Məclis sədrinin müavini Valeh Ələsgərovun başçılığı ilə parlament nümayəndə heyəti fevralın 10-da Kiyevdə keçiriləcək MDB Parlamentlərarası Assambleyası Şurasının iclasında iştirak edəcək. Bu barədə Trend ə Milli Məclisin mətbuat xidmətindən bildiriblər.
Nümayəndə heyətinin tərkibinə parlamentin regional məsələlər daimi komissiyasının sədri Arif Rəhimzadə və Milli Məclisin MDB PA-dakı nümayəndəsi Aydın Cəfərov daxildir.
Tədbirdə texnogen fəalakətlərin qarşısının alınması, Çernobıl Atom Elektrik Stansiyasındakı qəzadan zərər çəkmiş vətəndaşların sosial müdafiəsinin qanunvericilik təminatı, MDB PA nümayəndələrinin Qazaxıstanda prezident seçkilərinin müşahidəsində iştirakı, demokratiyanın inkişafının, vətəndaşların seçki hüquqlarının qorunmasının və parlamentarizmin möhkəmləndirilməsinin monitorinqi üzrə Beynəlxalq İnstitut haqqında, habelə Rusiya Dövlət Dumasının 100 illiyinə hazırlıq işləri və digər məsələlər müzakirə olunacaq.
Azərbaycan parlament nümayəndə heyətinin Ukrayna Ali Radasının sədri Vladimir Litvin, Rusiya Federal Məclisi Federasiya Şurasının sədri Sergey Mironov və digər rəsmi şəxslərlə görüşlər nəzərdə tutulub. Nümayəndə heyəti Heydər Əliyevin Kiyev şəhərində və görkəmli oftamoloq alim, akademik Zərifə Əliyevanın İrpen şəhərində ucaldılmış abidələrini də ziyarət edəcək.
Səfər fevralın 11-də başa çatacaq.
