Yeni Azərbaycan Partiyası (YAP) sədrinin müavini, partiyanın icra katibi Əli Əhmədov ABŞ-ın Beynəlxalq Respublikaçılar İnstitutunun (BRİ) Bakı ofisinin rəhbəri Dallas Frorip ilə partiyanın qərargahında görüşüb. Bu barədə Trend ə YAP-ın mətbuat xidmətindən bildiriblər.
Görüşdə YAP ilə Beynəlxalq Respublikaçılar İnstitutu arasında qarşılıqlı əlaqələrin daha da genişləndirilməsi və bu əlaqələr çərçivəsində həyata keçiriləcək tədbirlər barədə geniş fikir mübadiləsi aparılıb. YAP-ın seçki strategiyasını yüksək qiymətləndirən ABŞ təmsilçisi hakim partiyanın nümayəndələrinin BRİ-nin seçki təcrübəsindən çox effektli formada istifadə etdiyini nəzərə çatdırıb. D.Froripin sözlərinə görə, YAP-ın son parlament seçkilərində möhtəşəm uğur qazanmasında onun beynəlxalq seçki təcrübəsindən səmərəli istifadə etməsinin mühüm rolu olub.
Ə.Əhmədov YAP ilə BRİ arasında mövcud əməkdaşlığın yüksək səviyyədə olduğunu qeyd edib. İki təşkilat arasında əlaqələrin gələcəkdə daha da genişləndiriləcəyinə əminliyini vurğulayıb.
Trend-in ən mühüm və maraqlı xəbərlərini "Telegram"da izləyin
