İsveçrə Azərbaycan və Ermənistan prezidentlərinin görüşünü təşkil etməyə hazırdır. Trend in xəbər verdiyi kimi, bu barədə fevralın 23-də İsveçrənin xarici işlər naziri xanım Nişlen Kalmi-Rey həmkarı Elmar Məmmədyarovla Bakıda görüşündən sonra bəyan edib.
Onun sözlərinə görə, Berndə Azərbaycan səfirliyinin açılması iki ölkə arasında ikitərəfli münasibətlərin inkişafına təkan verib. İsveçrə hökuməti Bakıda öz səfirliyini açmağı planlaşdırır. Bu ölkə Azərbaycanla ticari-iqtisadi münasibətlərin genişlənməsində, xüsusilə sərmayə qoyuluşu sahəsində maraqlıdır. Bu gün Bakıda investisiyaların qarşılıqlı qorunması, o cümlədən ikiqat vergi tutmanın aradan qaldırılmasına dair imzalanmış sazişlər Azərbaycanda İsveçrə şirkətlərinin fəaliyyətinin aktivləşməsi üçün yeni imkanlar açacaq. Xanım Nişlen Kalmi-Reyin sözlərinə görə, İsveçrə hökuməti əhalinin iqtisadi-sosial vəziyyətinin yaxşılaşdırılması istiqamətində Azərbaycana köməkliyin göstərilməsinin, ölkədə iqtisadi vəziyyətin qiymətləndirilməsinin, o cümlədən humanitar yardımın göstərilməsinin nəzərdə tutulduğu texniki yardıma dair saziş imzalamağı planlaşdırılır.
"İsveçrə ATƏT-in Minsk Qrupunun üzvü kimi Dağlıq Qarabağ münaqişəsinin beynəlxalq norma və prinsiplər əsasında həllinin tərəfdarıdır. Biz Cenevrədə münaqişə tərəfləri arasında danışıqların təşkili üçün şərait yaratmağa hazırıq" - deyə o qeyd edib. İsveçrənin XİN başçısı Xocalı faciəsi ilə bağlı sualı cavablandırarkən bildirib ki, onun ölkəsi həmişə bəşəriyyətə qarşı istənilən cinayətə qarşı çıxır. Onun sözlərinə görə, insan haqları İsveçrə üçün ən mühüm məsələdir. "Biz insan hüquqlarının müdafiəsinin tərəfdarıyıq", - deyə o vurğulayıb.
E.Məmmədyarov aparılmış danışıqlardan razı qaldığını bildirib və qeyd edib ki, ikitərəfli əməkdaşlığın bütün aspektləri ətraflı müzakirə edilib. O bildirib ki, Azərbaycan İsveçrə ilə iqtisadi münasibətlərin genişlənməsində maraqlıdır və bu ölkənin firmalarının Azərbaycanda daha yaxşı fəaliyyəti üçün hər cür şərait yaratmağa hazırdır.
Qeyd edək ki, danışıqların yekunları üzrə miqrasiya sahəsində əməkdaşlığa dair saziş imzalanıb, həmçinin, ikiqat vergi tutmanın aradan qaldırılması və qarşılıqlı sərmayələrin qorunması və təşviqinə dair iki sazişin imzalanması planlaşdırılır.
