Mayın 22-28-də Almaniyanın Berlin şəhərində Avropa Gənclər Parlamentinin (AGP) illik konfransı keçiriləcək. Bu barədə Trend ə Azərbaycan Gənclər Parlamentinin rəhbəri, "İrəli" Ümumrespublika Gənclər Hərəkatının həmtəsisçisi Ceyhun Osmanlı bildirib.
C.Osmanlı qeyd edib ki, konfransda Avropa Gənclər Parlamentinin rəhbər strukturlarına seçkilər də keçiriləcək. AGP-də Avropanın əksər dövlətlərinin təmsil olunduğunu bildirən C.Osmanlı Qafqazdan yalnız Azərbaycanın konfransa dəvət olduğunu qeyd edib: "MDB-dən də çox az dövlətin nümayəndəsi konfransda iştirak edəcək".
C.Osmanlı onu da vurğulayıb ki, konfransda Azərbaycanın AGP-yə üzvlük məsələsi də müzakirə olunacaq: "Eyni zamanda biz AGP nümayəndələrinin Azərbaycana dəvət edəcəyik. İstəyirik ki, Azərbaycan gəncləri ilə Avropa gəncləri arasında yeni əməkdaşlıq mərhələsini yaradaq".
Onu da bildirək ki, konfransda Azərbaycanı C.Osmanlının özü təmsil edəcək.