Gürcüstanın baş naziri Zurab Noqaideli bəyan edib ki, bu il onun ölkəsi öz ərazisi ilə Xəzər regionundan 25 mln ton neft nəql edəcək. Bu barədə Trend Praym-Nyusa istinadən xəbər verir.
İyunun 20-də Z.Noqaidelinin jurnalistlərə bildirdiyi kimi, "bu neft 3 yolla - Bakı-Tiflis-Ceyhan, Bakı-Supsa boru kəmərləri, o cümlədən dəmir yolu ilə nəql ediləcək".
"İlin sonunda Cənubi-Qafqaz qaz kəməri də işə düşəcək və Gürcüstan, həmçinin, digər ölkələr alternativ yolla qaz almağa başlayacaq", - deyə o bəyan edib.
Baş nazir vurğulayıb ki, "BTC layihəsi təkcə Gürcüstan üçün deyil, həm də bütün Avropa üçün vacibdir".
"Gələn ildən BTC neft kəmərinə birinci mərhələdə ildə 5 mln ton neft nəql edəcək Qazaxıstan da qoşulacaq", - deyə Z.Noqaideli qeyd edib.
"2007-ci ildə neft kəməri gündə 1 mln barel neft nəql edəcək. Bu, dünya balansında çatışmayan həcmdir və neft kəməri qiymətlərin mühüm sabitləşdirici amili olacaq", - deyə Z.Noqaideli bildirib.
Onun sözlərinə görə, 2008-ci ildən Gürcüstan neft kəmərinin fəaliyyətindən büdcəyə ildə təxminən 60 mln dollar gəlir əldə edəcək.