Avqustun 11-i saat 16.00-da Bakının Sabunçu rayonu Nardaran kəndinin "İmam Hüseyn" meydanında İsrailin Livanda həyata keçirdiyi hərbi əməliyyatlara etiraz olaraq növbəti mitinq keçiriləcək. Bu barədə Trend ə Azərbaycan İslam Partiyasının sədri Hacıağa Nuri bildirib.
H.Nuri qeyd edib ki, mitinqin keçirilməsi təşəbbüsü kənd camaatından gəlib: "Avqustun 4-də keçirilən mitinqdə əhali belə qərara gəldi ki, hər həftənin cümə günündə mitinq keçirsinlər. Biz mitinqləri o vaxtadək keçirəcəyik ki, İsrail Livana qarşı apardığı ədalətsiz müharibəyə son qoysun".
AİP sədri onu da əlavə edib ki, mitinq icazəsiz keçirilsə də, polislər Nardaran əhalisinə heç bir təzyiq göstərmirlər. H.Nuri qeyd edib ki, avqustun 11-ə planlaşdırılan mitinq əvvəlkinə nisbətən daha əzəmətli olacaq. Çünki bu aksiyaya Nardaran camaatından əlavə paytaxtdan islamçılar da qoşulacaq.
