"Gəncəyə gəlişimin ilkin məqsədi iqtisadi əlaqələrin genişlənməsi ilə yanaşı, Belarus traktorlarının Gəncə Avtomobil Zavodunda yığılması haqda layihənin hazırlanmasına nail olmaqdır". Bu sözləri Gəncədə səfərdə olan Belarusun Azərbaycandaki səfiri Nikolay Patskeviç söyləyib.
Trend-in məlumatına əsəsən, onun sözlərinə görə, respublikalar arasında iqtisadi əlaqələri genişləndirmək üçün belə görüşləri mütəmadi təşkil etmək planlaşdırılır.
"İcra hakimiyyətinin başçısı ilə də görüşdüm. Bu zaman əməkdaşlığın istiqamət və variantlarından danışaraq, əlaqələrin genişləndirilməsi məsələlərini müzakirə etdik. İlkin olaraq mütəxəssislərin biliklərinin artırılması yönündə işlərin görülməli olduğu qənaətinə gəlmişik. Hətta yaxın vaxtlarda Gəncə Avtomobil Zavodunun bir qrup peşəkar mütəxəssisinin Belarusdakı bu sahəyə aid bütün müəssisələrdə olmasını təşkil edəcəyik. Bu da onların təkmilləşməsinə və gələcəkdə nəzərdə tutduğumuz Belarus traktorlarının Gəncədə yığılmasının gerçəkləşdirilməsi zamanı lazımı kadrların olmasına kömək edəcək".
Nikolay Yermoloviç GAZ-da olan texnikaların traktor və digər növ maşınların yığılması üçün kifayət etdiyini dedi.
Səfir yalnız bu sahədə deyil, digər sahələrdə də əlaqələr yaratmaq planlarından danışdı: "Kənd təsərrüfatı məhsulları istehsalı və emalı sahəsində əlaqələrin inkişafına böyük ümid bəsləyirəm. Azərbaycanda elə məhsullar var ki, (misal üçün, pambıq) Belarusda yetişmir. Lakin bizdə pambıqdan məhsul istehsalı üçün yetərincə müəssisə var".
