Rusiya Azərbaycana təzyiq göstərir ki, o, Gürcüstana əlavə qaz satmasın. Trend in Tbilisidəki xüsusi müxbiri xəbər verir ki, bu barədə bu gün Bakıdan qayıdan Gürcüstan parlamentinin vitse-spikeri Mixail Maçavariani jurnalistlərə açıqlamasında bildirib. Maçavariani Bakıda Gürcüstanı QİƏT PA-nın toplantısında təmsil edib.
"Rusiya Azərbaycana deyir ki, əgər Rusiyadan Azərbaycana ixrac olunan qaz tranzitlə Gürcüstana gedirsə, o zaman qazın qiyməti Azərbaycan üçün də artacaq. Bizim azərbaycanlı həmkarlarımız bizə dedilər ki, Azərbaycanın hökümət orqanları Gürcüstana yardım etmək istəyir və onlar bu problemin həlli üçün yollar axtarırlar", - deyə Maçavariani bildirib. O vurğulayıb ki, bu cür təzyiq metodları yolverilməzdir.