Avropa Şurası Parlament Assambleyasının (AŞ PA) qış sessiyası çərçivəsində Azərbaycanın və Ermənistanın qurumdakı nümayəndə heyətləri arasında görüşün keçiriləcəyi istisna deyil. Bu barədə Trend ə açıqlamasında Azərbaycanın AŞ PA-dakı nümayəndə heyətinin üzvü, millət vəkili Gültəkin Hacıyeva bildirib.
"AŞ PA-nın 2005-ci ilin yanvarında qəbul etdiyi qətnamədə Azərbaycan və Ermənistan nümayəndə heyətləri arasında görüşlərin keçirilməsi tövsiyə edilir. Qurumun qış sessiyası çərçivəsində belə bir görüşün olub-olmayacağı yanvar ayında dəqiqləşəcək" - deyə Gültəkin Hacıyeva qeyd edib.
Millət vəkili deyib ki, AŞ PA-nın qarşıdan gələn iclası çərçivəsində Dağlıq Qarabağın azərbaycanlı və erməni icmalarının görüşü nəzərdə tutulmayıb: "Əgər belə bir görüşün keçirilməsi nəzərdə tutulsaydı, ona hazırlıq görülərdi. İndi belə bir hazırlıq aparılmır."
Xatırladaq ki, AŞ PA-nın qış sessiyası yanvarın 22-26-da Strasbunqda keçiriləcək. Azərbaycanın nümayəndə heyəti yanvarın 20-də Strasbunqa yola düşəcək.