Azərbaycan və Pakistan arasında iqtisadi əməkdaşlıq üzrə hökümətlərarası komissiyanın yanvarın 29-30-da keçiriləcək IV iclasının gündəliyinə müdafiə və müdafiə sənayesi sahəsində əməkdaşlığın genişləndirilməsi məsələləri daxil olacaq. Bu barədə Azərbaycanın Pakistandakı səfirliyinin iqtisadi məsələlər üzrə müşaviri Sabir Rzayev Trend ə eksklüziv olaraq məlumat verib.
Onun sözlərinə görə, iclasın gündəliyinə aşağıdakı məsələlər daxildir: ticarət, elm və texnologiya, rabitə, kənd təsərrüfatı, maliyyə, bank sahəsi, əmək, təhsil, səhiyyə, idman və turizm sahəsində əməkdaşlığın inkişafı. Bundan başqa, tərəflər energetika və təbii ehtiyatlar sahəsində əməkdaşlığın inkişaf etdirilməsi imkanlarını nəzərdən keçirəcəklər.
Diplomatın qeyd etdiyi kimi, tərəflər səviyyəsi onları qane etməyən ticarət əlaqələrinin genişləndirilməsi məsələlərinə böyük diqqət ayıracaqlar. Statistikaya əsasən, 2006-cı ilin yanvar-sentyabr aylarında əmtəə dövriyyəsinin həcmi 1,8 mln. ABŞ dolları təşkil edib, bunun 1,1 mln. ABŞ dolları idxal, 628 min ABŞ dolları ixracın payına düşür. Pakistandan Azərbaycana idxal olunan məhsulların siyahısına düyü, makaron məmulatları, vitaminlər, dərmanlar, çantalar, dəri məmulatları, mətbəx avadanlıqları, toxuculuq məmulatları, tütün emalı üçün avadanlıqlar, elektrik avadanlıqları, generatorlar və s. daxildir. Azərbaycandan Pakistana siqaretlər, propan, qarat metaldan tutumlar, tunel və yerqazıyan maşınların ehtiyat hissələri ixrac olunur.
S.Rzayevin sözlərinə görə, Pakistan tərəfdən komissiyaya neft və təbii sərvətlər naziri Əmanulla Xan Cadun başçılıq edir. Azərbaycan tərəfdən isə komissiyaya baş nazirin birinci müavini Yaqub Eyyubov başçılıq edir. Komissiyanın tərkibinə müdafiə sənayesi, xarici işlər, rabitə və informasiya texnologiyaları, təhsil, iqtisadi inkişaf, səhiyyə, maliyyə, kənd təsərrüfatı və b. nazirliklərin nazir müavinləri daxildir.