Gəncənin Üzeyir Hacıbəyov küçəsinin 20 nəfərə yaxın sakini kommunal problemlərlə bağlı Gəncə şəhər İcra Hakimiyyətinin başçısı Eldar Əzizovla görüşmək istəyiblər. Trendin Qərb Bürosunun verdiyi mədumata görə sakinlərin səyləri boşa çıxsa da, onlar problemlərini icra başçısının müavini və şəhər Kommunal Təsərrüfatı İstehsalat Birliyinin sədrinə deyə biliblər.
"Yaşadığımız yerdə onsuz da normal şəraitimiz yoxdur. Ərazidə qaz boruları olmadığından, belə soyuq havada yalnız elektrik enerjisindən istifadə edərək qızınırıq. Onun da qiymətini çox qaldırdıqlarından dəyərini ödəyə bilmirik. Bundan başqa əraziyə hər gün yalnız bir saat su verirlir. Bu şəraitdə yaşayanların ayda 20 manat işıq pulu verməyə imkanı çatar? Heç olmazsa elektrik enerjisi əvvəlki qayda ilə hesablansın, dam örtükləri təmir olunsun ki, gələn ilə sağ qalaq".
Bu sözləri Üzeyir Hacıbəyov, 4-cü döngə, bina 1-də yaşayan Zərifə Rəhimova deyib.
Sakinlərin problemlərini dinlədikdən sonra şəhər İH başçısının təsərrüfat məsələləri üzrə müavini Şahmalı Cavadov və Mənzil Kommunal Təsərrüfatı Birliyini sədri Abid Əliyev şikayətçilərin yaşadıqları ünvana yollanıblar.
Ş.Cavadov küçədəki bir sıra kommunal problemlərin yaxın vaxtlarda həll olunacağını bildirdi. "Sakinlər elektrik enerjisinin 50 faizlə hesablanmasın istəyirlər. Bu, mümkün olan məsələ deyil. Yalnız binanın bir neçə problemini həll etməyə çalışacağıq. Belə ki, kanalizasiya xətləri təmizlənəcək və yağışın qarşısını almaq üçün dam örtüyü bərpa olunacaq" - deyə Ş. Cavadov bildirdi.