Gələn həftə Bakıda Azərbaycanla Yunanıstan arasında parlamentlərarası əlaqələrin gələcək inkişaf məsələləri üzrə danışıqlar aparılacaq. Azərbaycanın Yunanıstandakı səfirliyinin birinci katibi Əkrəm Zeynallı eksklüziv olaraq Trend ə bildirib ki, məsləhətləşmələr yanvarın 23-də Yunanıstan parlamenti deputatlarının Azərbaycana səfəri çərçivəsində aparılacaq.
Nümayəndə heyətinə Azərbayacn-Yunanıstan parlamentlərarası dostluq qrupunun həmsədri Maksimus Xarakopulos başçılıq edəcək. Nümayəndə heyətinin tərkibinə Yunanıstan parlamentinin daha üç deputatı daxil olacaq, onların arasında Yunanıstanın qanunvericilik orqanında yeganə türk deputat İlham Əhməd də olacaq.
Diplomat bildirib ki, nümayəndə heyəti səfər çərçivəsində Azərbaycan Milli Məclisində, hökumət və ölkə rəhbərliyinin rəsmi şəxsləri ilə bir sıra görüşlər keçirməyi planlaşdırır.
Diplomat qeyd edib ki, parlamentlərarası dostluq qrupu 2004-cü ilin mayında yaradılıb. Azərbaycan tərəfindən qrupun həmsədri sosial siyasət üzrə daimi parlament komissiyasının sədri Hadı Rəcəblidir.
