Azərbaycan, Bakı / Trend , müx. İ.Xəlilova / Azərbaycan və Moldova hökumətləri arasında birbaşa aviareysin açılması haqqında razılaşma əldə olunub. Bakıda rəsmi səfərdə olan Moldovanın baş naziri Vasili Tarlevin bildirdiyi kimi, ölkələr arasında hava nəqliyyatının inkişafı iki ölkənin iqtisadi münasibətlərinin genişlənməsinə imkan yaradacaq. 2005-ci il aprelin 21-də AR və Moldova arasında hava nəqliyyatı haqqında hökumətlərarası saziş imzalanıb.
V.Tarlevin sözlərinə görə, keçirilmiş görüşlər zamanı müvafiq nazirlik və idarələrə birbaşa hava nəqliyyatının açılması üzrə tapşırıqların verilməsi haqqında razılıq əldə olunub. "Bütün bürokratik maneələr aradan qaldırılacaq, belə ki, ölkələr arasında biznesin inkişafı üçün münasib şərait yaratmaq lazımdır", - deyə baş nazir qeyd edib.
Beynəlxalq avtomobil nəqliyyatının inkişaf etdirilməsi məqsədilə AR Nəqliyyat Nazirliyi Bakı və Kişinyov arasında sərnişin daşınmalarının həyata keçirilməsinə icazə verib.
