Azərbaycan, Bakı / Trend müxbir S.İlhamqızı/ Azərbaycan müxalifəti, hüquq müdafiəçiləri Avropa Şurası Parlament Assambleyasına təqdim olunması üçün sənəd hazırlayır. Bu barədə Müsavat Partiyasının başqanı İsa Qəmbər cümə axşamı açıqlama verib.
Onun sözlərinə görə, AŞPA-nın aprelin 16-da başlayacaq sessiyasında iştirak etmək üçün Azərbaycandan geniş nümayəndə heyəti gedəcək. Azərbaycan müxalifətini, ictimai qurumları təmsil edən bu nümayəndələr ölkədəki mövcud ictimai-siyasi durumu, insan haqlarına dair vəziyyəti əks etdirən sənəd təqdim edəcəklər.
AŞPA-nın sessiyasına dəvət edilən Qəmbər bu toplantıya qatılmayacağını, lakin həmin sənədə imza atacağını deyib. Onun sözlərinə görə, sessiyanın ilk günündə - aprelin 16-da Azərbaycanla bağlı dinləmələr aparıldığından və həmin müzakirələrdə yalnız deputatların çıxış etmək imkanı olduğundan Qəmbər sonrakı günlərdə AŞPA-da ayrı-ayrı şəxslərlə görüşlər keçirməyi əhəmiyyətsiz hesab edir.